Governu França apoiu millaun $2 ba programa bee-moos iha Timor-Leste

DILI, 23 agostu 2022 (TATOLI)—Governu França liuhosi Institutu Francais durante ne’e fó ona apoiu finanseiru millaun $2 ba programa no dezenvolvimentu setór bee-moos iha Timor-Leste.
“Durante ne’e maizumenus ami fó apoiu finanseiru ba Timor-Leste besik millaun $2 hodi foka liu ba área esensiál bee-moos, seguransa alimentár,” Diretór Institutu Français, Stéphane Dovert, informa ba jornalista sira hafoin ramata enkontru ho Prezidente Repúblika, José Ramos Horta, iha Palásiu Prezidensiál Nicolau Lobato, Bairru Pite, tersa ne’e.
Durante enkontru ho Xefe Estadu ne’e ko’alia kona-ba kooperasaun nasaun rua liu-liu dezenvolvimentu nasaun rua ne’e nian no apoiu França nian hodi implementa programa bee-moos iha rai-laran ne’ebé la’o ona dezde iha tinan 2018 iha munisípiu sira.
Liuhosi apoiu fundu ne’ebé iha hahú implementa ona atividade sira hanesan liuhosi kooperasaun servisu hamutuk ho organizasaun naun governamentál PERMATIL hala’o servisu mak halo barajen hodi rai (halibur) bee ba tempu naruk.
“Kona-ba seguransa alimentár tenke rezolve uluk bee-moos tanba iha Timor-Leste asuntu bee importante tebes,” nia hateten.
Nune’e mós reprezentante França iha Timor-Leste, Estelle Duluc, hateten kooperasaun ho Timor-Leste haree ba bee-moos, biodivesrsidade, direitu umanu no igualidade jéneru.
Nia haktuir, durante enkontru Prezidente Repúblika (PR) gosta tebes projetu bee-moos no agrikultura nune’e PR hato’o agradesimentu ba Governu França.
Iha sorumutu ne’e ko’alia sensivel tebes ba bee-moos tanba hosi bee-moos ne’e mak komunidade kuda produtu, nune’e bele ko’alia kona-ba seguransa alimentár, agrikultura iha Timor-Leste.
PR konsidera asuntu ne’e importante tebes no husu oinsá apoiu hetan peritu internasionál ida kona-ba setór bee ninian.
Jornalista : Nelson de Sousa
Editór : Cancio Ximenes

