DILI, 23 agostu 2022 (TATOLI) – Embaixadór Índia ba Indonézia no Timor-Leste, Manoj Kumar Baharti, hateten India prontu koopera ho Timor-Leste hodi kria ka dezenvolve Sistema Identidade úniku ka Sistema identifikasaun Únika.
Embaixádór Índia hato’o kompromisu ne’e bainhira hasoru Primeiru Ministru, Taur Matan Ruak iha nia rezidénsia ofisiál Faról-Dili, tersa ne’e.
“Ami bele apoiu ba Timor – Leste iha Sistema identidade úniku atu bele fasilita ema hotu ho di’ak,” dehan Embaxadór ne’e ba Jornalista sira hafoin hasoru malu Primeiru Ministru Taur Matan Ruak iha Farol Dili foin lalais ne’e.
Identidade úniku ka ID únika sei estabelese identidade dijitál bazeia ba konjuta mínimu dadus, ne’ebé inklui númeru aleatóriu ida, dadus biográfiku sira no informasaun biométrika.
Nune’e, Diplomata ne’e dehan Sistema ne’e permite sidadaun no rezidente sira iha asesu ba servisu públiku no privadu sira.
Nune’e mós, sei ajuda setór privadu no Governu atu hamenus fraude no identidade falsa sira no ko’a kustu tranzasaun ba verifikasaun identidade.
Tanba ne’e, Governu liuhosi Agência Teknolojia Informasaun no Komunikasaun, Instituto Públiku (TIC Timor I.P) hahú halo preparasaun ba implementa entre tinan 2021 no 2025, ne’ebé hakarak atu rejista ema millaun 1-resin no vincula identidade dijitál ba setór bankáriu no telekomunikasaun, ba rejistu sivíl, ba rejistu eleitór, saúde no edukasaunm ba rejistu empreza no banku dadus funsionál importante sira seluk.
Estratejia no planu operasionál dezenvolve ona internamente hosi Governu, liuhosi prosesu konsultivu ida hosi Komisaun Téknika ne’ebé lidera hosi Prezidénsia Konsellu Ministru Ministériu Justisa no TIC Timor.
Preparasaun ne’e partisipa diretamente hosi Ministériu Saúde, Ministériu Edukasaun, Juventude no Desportu, Ministériu Finansa, Ministériu Interiór, Ministériu Administrasaun Estatál, Ministériu Solidariedade, Sosiál no Inkluzaun Sosiál no Komisaun Funsaun Públika.
Notísia relevante: Governu prepara kondisaun implementa Sistema Identifikasaun Únika
Jornalista: Hortencio Sanchez
Editór : Florencio Miranda Ximenes
