BAUCAU, 23 agostu 2022 (TATOLI) – Komunidade suku Gariuai, postu administrativu Baucau Vila, munisípiu Baucau, hetan munisaun hamutuk 685 iha fatuk kuak ne’ebé uluk subar no utiliza hosi gerrilleiru FALINTIL sira iha períodu rezisténsia.
Xefi suku Gariuai, Arlindo Belo Freitas, esplika, ekipamentu funu refere hetan hosi komunidade iha área Gunisi, aldeia Bahamori, suku Gariuai, postu administrativu Baucau Vila iha loron segunda, 22 agostu bainhira tá ai atu utiliza ba serimónia kulturál.
“Ida-ne’e obrigasaun ami tenke entrega tanba sasán funu nian, ita ta’uk iha ema terseira parte laiha responsabilidade ne’ebé bele utiliza ameasa komunidade no ita tomak,” Xefe suku Gariuai informa ba Tatoli liuhosi telefónika, tersa ne’e.
Autoridade suku Gariuai rasik informa kedas ba parte seguransa hanesan Servisu Nasionál Intelijénsia (SNI) kompostu FALINTIL-FDTL no PNTL kona-ba ekipamentu funu refere no konfirmadu katak munisaun refere uluk subar hosi gerrilleiru Falintil ne’ebé hala’o operasaun iha zona Fatumaca.
Daudaun ne’e monisaun refere entrega no transporta ona ba Dili liuhosi Servisu Nasionál Intelijénsia (SNI) hodi asegura.
Jornalista : Natalino Belo
Editór : Evaristo Soares Martins
