Korpo Pás kapasita parseiru sira iha Bobonaro jere projetu komunitária
BOBONARO, 23 agostu 2022 (TATOLI) – Korpu da Pás tersa ne’e, realiza formasaun ba parseiru serbisu sira iha munisípiu Bobonaro atu dezeña no halo jestaun ba projetu komuntária sira.
Formasaun ne’e envolve parseria serbisu sira ho objetivu atu dezenvolve abilidade iha planeamentu, implementasaun no avaliasaun ba projetu sira iha komunidade, nune’e bele iha koñesimentu oinsá mak bele dezeña projetu no jere projetu ida.
Formasaun ne’e foka de’it ba teoria kona-bá siklu projetu inklui halo levantamentu dadus hosi nesesidade, meta no vizaun projetu, planu implementasaun, kria orsamentu projetu,p lanu monitorizasaun no avaliasaun.
Iha kada etapa siklu projetu ne’e sei aprende kona-bá instrumentu balun ne’ebé sei uza hodi fasilita dezeña projetu,ezemplu hanesan rekursu, determina no prioridade projetu.
“Belun sira-ne’ebé serbisu iha Organizasaun Naun Governamentál (ONG) sira karik iha ideia barak oinsá ita atu dezeña projetu ida, maibé ohin loron ita-boot sira mos sei iha oportunidade atubele haree kona-bá dezeéa projetu liuhosi halo vizaun no meta sira,” Diretór Korpu da Pás, Jaime Fouse, hateten iha salaun Cruz Vermela Timor-Leste (CVTL) filiál Maliana, tersa ne’e.
Prezidente Autoridade Munisípiu Bobonaro, Ernesto de Oliveira Barreto, agradese ba Korpu da Pás tanba iha inisiativa di’ak mai imveste osan no matenek iha munisípiu Bobonaro nune’e entidade sira bele rezolve problema komunidade nian.
“Formasaun kona-bá jestaun projetu ne’e hanesan buat foun ida, signifika ita seidauk hatene, entaun atu hatene kle’an liu buat sira ne’e ita-nia partisipasaun tenke uza didi’ak tempu ne’e, nune’e fila ba uma karik ita fó esplikasaun ba sira seluk, atubele implementa projetu ida,” nia dehan.
Partisipante ne’ebé partisipa iha formasaun ne’e 20-resin, mai hosi Organizasaun Naun Governamentál sira, Cruz Vermelha Timor-Leste no autoridade lokál hosi suku Holsa no Lahomea.
Jornalista: Sérgio da Cruz
Editór: Evaristo Soares Martins
