Membru Polísia Militár na’in-37 hahú kursu operasaun maubere VI
DILI, 23 agostu 2022 (TATOLI)— Membru foun hosi FALINTIL-Forsa Defeza Timor-Leste (F-FDTL) na’in-37, selesionadu sai membru Unidade Polísia Militár (PM) hodi hahú kursu operasaun Maubere VI.
Kursu operasaun militár ba kadete foun na’in-37 ne’e durante fulan tolu atubele hatene rega, fiziku militár nian, ba tiru, oinsá atu halo komunikasaun di’ak no oinsá atu fó seguransa ba alta entidade sira.
Ho nune’e, Komandante Unidade Polísia Militár (PM), Majór Abel da Costa Xavier “Niki” husu ba membru hirak ne’e atu partisipa kursu ka treinamentu ho disipliña, pontualidade no kamaradajen entre membru no inspetór sira.
“Ha’u husu ba ita bo’ot sira regra militár saida de’it mak instrutór sira inpoin hanesan membru militár tenke kumpre hodi sai polísia militár ida ne’ebé maka disipliñadu hodi serbí povu no nasaun,” Komandante Níki hateten liuhosi intervesaun abertura kursu operasaun Maubere VI ne’e iha Kinta Boot-Dili, tersa ne’e.
Durante fulan tolu, nia husu ba ajente foun sira ne’ebé hasoru problema saúde bele informa atu iha akompañamentu hosi instrutór sira hodi bele hetan asisténsia saúde.
Membru foun na’in-37 ne’ebé selesionadu ba PM ne’e sei tuir formasaun durante fulan tolu no instrutór bele fó autorizasaun fim da semana atu fila ba uma hamutuk ho família, maibé laiha autorizasaun atu ba hemu tua no ba iha diskoteka no bár sira atu hemu, kuandu formadu sira viola iha parada sei hetan sansaun disipliñar.
“Ha’u apela ba imi iha ne’e komandante nia oan no família la eziste, maibé iha fatin ne’e eziste de’it kadete foun ba polisia militar, tanba ne’e tenke disiplina no labele halimar iha formasaun ne’e,” katak Komandante NIKI.
Iha fatin hanesan, Xefe Estadu Maiór Jenerál F-FDTL, Brigadeiro Jenerál Cornelio Ximenes “Maunana” agardese ba Forsa Defeza Militár Brázil nia ne’ebé apoiu hodi fasilita formasaun kursu operasaun maubere VI ba membru foun Unidade Polisia Militár.
“Ha’u husu ba kadete foun Polísia Militár tenke disipliña, responsabilidade no espiristu sakrifisiu atu imi bele kumpre regra no ordem ne’ebé mak instrutor sira fo ba imi atu aprende,” Nia afirma.
Tanba ne’e, nia husu ba kadate foun sira tenke aproveita didiak kursu operasaun maubere VI, hodi bele hatene rega saida de’it mak iha Unidade Polisia Militár nia liuliu tékniku sira ne’ebé maka instrutór sira fó nune’e sai batadór Polisia Militar.
“Ho ita nia lema Polisia Militár prontu, ida ne’e mak tenke rai iha imi nia ulun atu rona komandante sira atu simu orden saida de’it maka iha, atubele servisu ho fuan ba ita nia povu no nasaun,” Mau-Nana enkoraja.
Jornalista: Natalino Costa
Editór : Florencio Miranda Ximenes
