PNTL kontinua buka sasin ba Padre Abito Brites nia-mate
DILI, 23 agostu 2022 (TATOLI)— Komandante Tránzitu Komandu Polisia Nasionál Timor-Leste (PNTL), Munisípiu Dili, Inspetór Polisia Domingos Gama, hateten daudaun ne’e kontinua buka sasin balun kona-ba asidente tráfegu ne’ebé hamate Padre Abito Casimeiro Brites, iha área Dare, Munisípiu Dili.
Tuir kronolojia ne’ebé konta hosi sasin, feto ida ho inisiál MRS ne’ebé akompaña hamutuk ho Amu Abito katak asidente ne’e akontese iha segunda (22/08), maizumenus iha tuku 20:00. Padre matebian Abito hetan asidente tráfegu ho motór tipu Jupiter MX ho xapa matrikula E 8081.
“Amo matebian maka mensajen MRS tinan (27), nu’udar estudante UNTL, atu akompaña ho Padre atu ba han iha restaurante ida iha área área Dare ninian. Maibé sira na’in-rua la konsege to’o iha fatin ne’eba tanba fila de’it dalan klaran. Tanba haree ba kondisaun rai ne’e kalan ona entaun sira nain rua fila fali mai Dili,” Komandante Tránzitu Munisípiu Dili ne’e hateten ba Jornalista sira iha Ciacoli.
Tuir deklarasaun hosi sasin feto ne’e katak hafoin fila akompaña padre liuhosi dalan foun Diresaun Manumeta rai-hun atu mai Dili, derepente soke barajen estrada hodi rezulta sira na’in-rua monu ba iha baleta kuak, nune’e padre baku nia ulun ba parede no hetan pankada maka’as no feto ne’e baku hirus matan no hirus matan mak moras.
Hafoin akontesimentu komunidade evakua kedan sira na’in-rua mai iha Hospitál Nasionál Guido Valadares Dili. Maibé la konsege salva Padre nia vida tanba hetan pankada maka’as iha parte ulun.
“Ita nia sidadaun feto ne’ebé hamutuk amo matebian hodi hetan asidente ne’e, oras iha uma hafoin halo tratamentu iha HNGV, tanba nia hirus matan maka sei moras uituan tanba ne’e ita nian investigadór sira seidauk investiga didi’ak nia, maibé loron ida ka rua tan ita husu ninian presenza para alin feto ne’e fó nia deklarasaun kompletu liga ho asidente ne’e,” nia relata.
Nune’e, Komandante ne’e husu ba komunidade sira balun maka momentu ne’e hetan akontesimentu ne’e bele mai presta deklasaun, nune’e ita bele sustenta ba investigasaun.
“Ita la taka dalan ba komunidade balun ne’ebé iha momentu ne’e hetan asidente ne’e atu sai testamuña hodi halo deklarasaun ruma atubele reforsa informasaun ba sira ba asidente ne’e,” nia afirma.
Nia hateten, kona-ba Amo nia isin mate dadaun sei iha hela mortuáriu HNGV hodi submete ba iha prosesu outópsia.
Jornalista: Natalino Costa
Editór: Florencio Miranda Ximenes
