DILI, 24 agostu 2022 (TATOLI)—P rezidente Repúblika (PR), José Ramos Horta, hateten rezultadu referendu ka konsulta populár 30 agostu 1999 mai hosi povu nia luta libertasaun durante tinan 24 hasoru okupasaun ilegál militár Indonézia.
Notísia Relevante: Konsulta Populár 1999, David Mandati telefone Xanana Gusmão iha Cipinang
Horta hatutan, tinan 23 liu ba ho Xanana Gusmão nia matenek kondús negosiasaun ho Nasaun Unida, Portugál, Indonézia tanba momentu ne’eba kondisaun laiha liu atu halo konsulta populár tanba situasaun rungu-ranga ne’e sé mak atu halo eleisaun no ONU nunka halo referendu ho situasaun seguransa ladi’ak.
Maibé iha Timor-Leste situasaun defisíl momentu ne’eba ONU hakarak adia konsulta popular maibé Xanana Gusmão tuku meza hodi hateten tinan 24 povu Timor terus ema mate la ta’uk agora halo povu fó nia votu ne’e imi hakarak adi’a fali, agora tenke la’o ba oin.
“Se adia karik momentu ne’eba konsulta populár sei la akontese to’o mai agora, nune’e Xanana nia matenek hodi akontese konsulta popular maibé ne’e rezultadu mai hosi povu nia luta tinan 24,” PR Horta, hateten ba jornalista sira relasiona ho komemorasaun loron konsulta populár ba dala-23 (30 agostu 1999-30 agostu 2022), iha edifiu IADE, Mandarin, kuarta ne’e.
Xefe Estadu ne’e dehan, klaru ho lidér sira hanesan Xanana Gusmão, Taur Matan Ruak, Lere Anan Timur, Falur Rate Laek no lidér lubun ida frente armada nian maibé frente klandestina joven sira, igreja ne’e mak lori Timor-Leste to’o referendu.
“Ne’eduni momentu ida-ne’e 30 agostu hakruk ba sira hotu no hakruuk liu ba memória Nicolau Lobato, avo Francisco Xavier, Xanana ho nia matenek mak oras ne’e ita rai ida bele livre demokrásia no hetan elojia iha mundu hanesan iha primeiru demokrásia no liberdade imprensa númeru ida iha ASEAN,” nia hateten.
Notísia Relevante: Rezultadu konsulta populár determina futuru TL sai nasaun independente
Jornalista : Nelson de Sousa
Editór : Cancio Ximenes
