iklan

NASIONÁL, POLÍTIKA

2022, CNC konstrui ona “Uma Memória Esperansa” 10 ba sobrevivente sira

2022, CNC konstrui ona “Uma Memória Esperansa” 10 ba sobrevivente sira

Diretór Ezekutivu Centro Nacional Chega (CNC), Hugo Maria Fernandes. Imajen Tatoli/António Gonçalves.

DILI, 25 agostu 2022 (TATOLI)—Diretór Ezekutivu Centro Nacional Chega (CNC), Hugo Maria Fernandes, informa iha tinan ne’e CNC konstrui ona “Uma Memória Esperansa” 10 ho orsamentu 2021 nian, no tuir planu sei entrega xave “Uma Memória Esperansa” ba sobrevivente ida iha munisípiu Viqueque.

Notísia Relevante: CNC entrega ona “Uma Memoria Esperansa” haat ba sobrevivente  

“Uma Memória Esperansa, ita halo uma 10 ho orsamentu tinan 2021 no prosesu atu kompleta uma ne’e hahú inísiu tinan ne’e, bainhira Primeiru-Ministru inaugura uma ida iha Maubara no to’o iha semana rua liubá ita entrega tan uma ida iha Ataúro. Agora hela tan uma ida-ne’ebé sei entegra xave iha fulan ne’e nia laran ka fulan oin, mak iha Viqueque, hodi kompleta uma 10 ne’ebé ita halo ho orsamentu tinan kotuk nian,” Hugo Maria Fernandes hateten ba Agência Tatoli, iha nia kna’ar fatin Eis Antigu Komarka, Balide, kinta ne’e.

CNC atu entrega xave “Uma Memória Esperansa” iha Viqueque ne’e kle’ur tanba distánsia hosi uma ba iha Viqueque dook, nune’e iha dezáfiu ba lori materiál konstrusaun to’o iha fatin ne’e defisil entaun konstrusaun ne’e atraza atu kompleta lalais uma ne’e.

Aleinde ne’e, iha konstrusaun uma seluk mós iha prosesu atu kompleta tanba fatin hanesan iha Mauxiga-Ainaro ne’e sa’e ba foho leten, entaun materiál sira lori ba dook no ida iha Ataúro semana rua liubá mós entrega hasoru dezáfiu entre uma na’in ho badaen, tanba uma nain hakarak envolve entaun buat hotu halo neineik.

Ida-ne’e mós dezafiu ida-ne’ebé CNC ho badaen sira enfrenta, tanba balun husik tomak ba badaen sira mak halo no balun sobrevivente sira rasik hakarak envolve, entaun hosi ne’e CNC akompana mós sobrevivente sira-nia hakarak, dala ruma uma sira-ne’e sai atraza iha bainhira atu kompleta.

Maske nune’e, nia dehan, CNC atu entrega xave “Uma Memória Esperansa” ikusliu ba orsamentu tinan 2021 nian mak iha Viqueque ne’e.

Kona-ba prosesu konstrusaun ba uma iha Viqueque, nia aumenta, prosesu konstrusaun Uma Memória Esperansa hanesan bainbain, tanba durante ne’e CNC halo parseria ho Asosiasaun Vítima Konflitu Pasadu, atu sobrevivante sira hetan apoiu ba Uma Memória Esperansa.

“Ita halo transferénsia ba Asosiasaun Vítima, hosi ne’e sira halo kontratu ho badaen sira. Tanba osan ba kada uma ita transfere ba Asosiasaun Vítima nia konta, depois mak buka badaen no sira mak halo kontratu ho badaen sira. Klaru, dezenu ba uma ne’e CNC mak dezenu no CNC mak lori ba Obra Públika no ADN atu hetan aprovasaun ba dezeñu ne’e, depois hotu mak ita transfere osan ba Asosiasaun Vítima,” nia dehan.

Nune’e, bainhira atu hetan finalizasaun ba “Uma Memória Esperansa” mak Asosiasaun Vítima nia responsabilidade, tanba CNC halo ona transferénsia osan ba Asosiasaun Vítima.

“Nia lala’ok tomak iha terrenu mak Asosiasaun Vítima Konflitu Pasadu mak toma konta, entaun tuir relatóriu ami hetan hosi sira no rezultadu monitorizasaun katak dahuluk dezáfiu boot mak materiál konstrusaun liu-liu mak uma sira dook hosi sidade, ho ida ne’e halo kauza atraza,” nia dehan.

Aleinde ne’e, komparasaun kustu “Uma Memória Esperansa” kiik loos, ho nune’e ho konstrusaun uma ne’e ema halo servisu voluntáriu mak barak.

“Tanba, iha servisu voluntáriu ne’e, ita iha intensaun hakarak duni mobiliza solidariedade komunidade nian atu depois hamutuk ho badaen no sobrevivente harii hamutuk uma ne’e. Ida ne’e, ita hakarak duni hamosu fali esperítu ida tulun malu, tanba iha badaen ida komunidade no familia hotu mak ba ajuda halo uma, nune’e hamosu solidaridade. Tanba hosi Estadu liuhosi osan ne’ebé CNC atribui ba, maibé komunidade mós tenke hamosu solidaridade ida hosi sira. Entaun ida-ne’e mak prosesu sira halo atu kompleta uma ne’e han tempu, tanba ita depende ba ema mai servisu,” Diretór CNC ne’e informa.

Kona-ba medida “Uma Memoria Esperansa” iha Viqueque, nia esplika, medida uma iha Viqueque hanesan mós ho medida uma sira seluk, maibé medida kiik mak iha Mauxiga.

“Maibé, restu medida hanesan 9X7, kuartu tolu iha laran, iha sala vizita ida, varanda oin, haris fatin iha laran no dapur iha kotuk,” nia dehan.

Jornalista : Nelia Fernandes

Editór      : Cancio Ximenes

iklan
iklan

Leave a Reply

iklan
error: Content is protected !!