Almirante António Silva fó omenajen ba eroi-sira iha jardín Metinaro
DILI, 25 agostu 2022 (TATOLI)— Xefe Estadu Maiór Jenerál Forsa Armada Portugal, Almirante António Silva Ribeiro, kinta (25/08), halo vizita ba iha jardín eroi Metinaro hodi fó omenajen ba eroi libertasaun pátria.
Iha vizita ne’e, Jenerál Almirante António Silva Ribeiro tau aifunan iha simitériu Saudoso Komandante Nino Konis Santana nian, atu fó omenajen ba erói sira nia luta, ne’ebé reziste to’o liberta povu no Nasaun doben Timor -Leste hosi kolonialista sira.
Hafoin, tau ai-funan iha rate saudozo Nino Konis Santana, Jenerál Almirante António Silva Ribeiro hamonu matan ween tanba maske la hasoru Nino Konis Santana, maibé sempre kontaktu nia liuhusi telefone satelite.
“Ha’u sempre ko’alia beibeik liuhosi telefone satélite ho saudozo Konis Santana, maske la hasoru malu. No Ha’u ho saudoso Konis iha relasaun emosional ida metin tebes-tebes, hodi konsidera saudozo nu’udar komandante FALINTIL ida ne’ebé nasionalista maka’as hodi kontribui defende ukun rasik a’an,” hateten Xefe Estadu Maiór Jenerál Forsa Armada Portugál liuhosi nota ne’ebé Agência TATOLI asesu, kinta ne’e.
Entertantu iha vizita Xefe Estadu Maiór Jenerál Forsa Armada Portugál ba iha Semitériu Jardín eroi Metinaro ne’e hetan akompanamentu hosi Brigadeiro Jenerál Cornelio Ximenes “Maunana” inklui ofisiál no sub-alternu sira.
Jornalista: Natalino Costa
Editór : Florencio Miranda Ximenes
