DILI, 25 agostu 2022 (TATOLI)–Eletricidade de Timor-Leste, Empreza Públika (EDTL, E.P), kinta ne’e, halo inaugurasaun liña eletrisidade ba aldeia Weberek, suku Dotik, postu administrativu Alas, munisípiu Manufahi.
Prezidente Konsellu Administrasaun EDTL, E.P, Paulo da Silva, hateten, liña eletrisidade ne’ebé ohin komunidade Weberek asesu ona hanesan planu hosi VIII Governu ne’ebé hakarak suku iha Timor laran tomak hotu tenke asesu liña eletrisidade.
“Ha’u husu ba komunidade ne’ebé ohin asesu ona liña eletrisidade, ba oin tenke uza ho kuidadu no EDTL sei fó fulan-haat ba ita-boot sira uza gratuita, maibé liu ida-ne’e ekipa tékniku sei mai monta fali kontadór ho objetivu rua hanesan kontrola utilizasaun energia elétrika hanesan uza pulsa no utiliza enerjia ne’e ho di’ak, nune’e bele ajuda ita-nia Governu poupa enerjia sentrál ne’ebé kada tinan hasai osan sosa kombustível,” Prezidente Konsellu Administrasaun EDTL, E.P hateten iha aldeia Weberek, kinta ne’e.
Notísia relevante: EDTL hahú reativa estasaun venda pulsa eletrisidade iha Lolotoe
Nia parte husu ba líder komunitáriu sira hodi halo proposta mensiona aldeia sira ne’ebé seidauk hetan liña eletrisidade, nune’e nia parte bele orienta tékniku sira bá halo levantamentu dadus no tau iha planu hodi dada ahi.
Iha biban hanesan, Prezidente Autoridade Nasionál ba Eletrisidade, Institutu Públiku (ANE, I.P), Ruben Jerónimo Freitas, husu ba komunidade suku Dotik, liuliu aldeia Weberek ne’ebé ohin hetan ona ahi nia naroman ba oin tenke uza ho kuidadu.
“ANE, I.P nu’udár autoridade ne’ebé regula eletrisidade, ha’u husu imi uza ho kuidadu, liuliu uza lampu no fiu ne’ebé uza iha uma laran tenke ho kualidade, nune’e labele fó impaktu ba imi,” nia fó hanoin.
Nune’e mós, Xefe suku Dotik, Sebastião da Costa Amaral, hateten nu’udar líder komunitáriu, nia parte agradese ba Governu ne’ebé bele halo esforsu hodi ohin suku Dotik nia aldeia Weberek bele asesu ona liña eletrisidade hafoin Timor-Leste restaura ninia independénsia.
“Ha’u sente kontente tebes tanba ohin loron hau-nia aldeia Weberek ho totál uma-kain 219 ho populasaun 1.086 bele asesu ona ahi nia naroman durante tinan barak,” nia tenik.
Suku Dotik rasik iha aldeia tolu hanesan Weberek, Lakluan no Sarin, ne’ebé Weberek iha uma-kain 219 ho populasaun 1.086, Lakluan iha uma-kain 209 ho populasaun 899, no aldeia Sarin iha uma-kain 65 ho populasaun 310.
“Totál uma-kain suku Dotik hamutuk 488 ho totál populasaun hamutuk 2.295, hosi hau-nia populasaun ne’e, iha aldeia rua mak hetan ona liña eletrisidade maibé aldeia Sarin tomak to’o agora seidauk hetan liña eletrisidade tanba estrada bá aldeia refere mós laiha,” Autoridade lokál haktuir.
Nune’e, preokupasaun sira ne’e nia parte hato’o ona ba Institutu Jestaun Ekipamentu, Institutu Públiku (IGE,I.P sigla portugés) liuhosi proposta atu loke estrada ba aldeia, nune’e bele dada liña eletrisidade hosi Weberek bá Sarin no estrada ne’ebé presiza loke ne’e hosi suku Dotik ba aldeia refere hamutuk metru 17.
“Husu Governu ba oin bele ajuda nune’e komunidade aldeia Sarin bele hetan liña eletrisidade tuir planu VIII Governu nian ne’ebé hateten antes ramata tinan 2022 komunidade hotu bele asesu ona liña eletrisidade. Preokupasaun seluk ne’ebé ha’u-nia komunidade hasoru mak estrada no bee-moos, maibé bee-moos ne’e aldeia Sarin no Weberek liuliu aldeia Sarin tanba komunidade refere rasik la asesu bee-moos durante ne’e, maka konsumu de’it bee mota no estrada tempu udan mota sempre sobu dalan no ponte sira ne’ebé iha,” nia dehan.
Liña eletrisidade ne’ebé ohin EDTL,E.P halo inaugurasaun ne’e tama ba projetu pakote 34 no toma-konta hosi empreza lokál Turila Unipessoal Lda, ne’ebé asina kontratu iha 31 janeiru 2022 no hahú serbisu iha loron 15 marsu 2022 to’o ramata ho kustu $257.113,16.
Jornalista : Arminda Fonseca
Editora : Julia Chatarina
