DILI, 25 agostu 2022 (TATOLI)–Diretór Ezekutivu Institutu Apoiu Dezenvovimentu Emprezariál (IADE), Filomeno Marcelino Belo, informa, ema hamutuk na’in-769 kompostu hosi feto 405 no mane 364 sai benefisiáriu formasaun iha área tolu inklui kompetisaun planu negósiu no inovativu (KPNI).
Formasaun no kapasitasaun emprezáriu área tolu ne’e mak hanesan programa fasilidade inkubasaun negósiu (FIN), marketing plus no KPNI.
“Formasaun no kapasitasaun ba emprezáriu sira iha área oin-oin tuir nesesidade emprezáriu sira-nian. Hosi programa ne’e mak iha sub-atividade barak, programa formasaun no kapasitasaun emprezariál ne’e fahe ba tipu tolu mak formasaun báziku, médiu no avansadu,” Diretór Ezekutivu ne’e relata ba Agência Tatoli iha ninia knaar fatin, Bebora, kinta ne’e.
Notísia relevante: Joven na’in-10 kompete iha planu negósiu inovativu setór turizmu 2022
Enkuantu, benefisiáriu hosi KPNI hamutuk 239 kmpostu hosi feto 100 no mane 139, programa FIM iha tinan 2022 IADE fó apoiu ba empreza 16 iha territóriu nasionál ho orsamentu $120.000.
“Benefisiáriu sira ne’e emprezáriu mane 14 no mane rua, programa ne’e bele dehan IADE nia programa primadona aleinde KPNI,” nia subliña.
Tipu apoiu iha tolu mak orsamentu operasionál, sosa matéria prima, no sosa materiál no ekipamentu ba sira ne’ebé halo produsaun, ne’ebé apoiu kiik liu mak $3.500 no boot liu $14.000.
Jornalista : Antónia Gusmão
Editora : Julia Chatarina
