Estudante mellór graduadu 287 hala’o ona estájiu profisionál
DILI, 25 agostu 2022 (TATOLI)–Estudante non bolseiru hamutuk 287 ho kategoria mellór graduadu iha Instituisaun Ensinu Superiór Públiku no Privadu 18 iha rai-laran hala’o ona estájiu profisionál iha instituisaun no empreza Estadu inklui empreza privadu sira.
Diretór Ezekutivu Fundu Dezenvolvimentu Kapitál Umanu (FDCH, sigla portugés), Cristóvão dos Reis, relata katak dadus estudante mellór graduadu ne’ebé rekolla antes ne’e hamutuk 445.
“Ita-nia estudante mellór graduadu sira sei koloka la’os iha Dili laran de’it, maibé sira balun ba munisípiu sira hanesan Baucau, Lautém, Manufahi no Liquiçá. Agora ita sei aloka tan ba munisípiu seluk maibé ita sei prosesa hela atu nune’e bele hetan distribuisaun,” Diretór Ezekutivu hateten iha edifísiu FDCH, Palásiu Governu, kinta ne’e.
Notísia relevante: Instituisaun 13 prontu simu estudante 445 hala’o estájiu profisionál
Estudante mellór graduadu 287 ne’ebé koloka ona, kompostu hosi feto 158 no mane 129, enkuantu iha tan seluk ne’ebé konfirma atu koloka tan hamutuk 158 ba instituisaun ne’ebé indentifika ona hamutuk 103.
“Programa estájiu profisionál ba mellór graduadu sira ho ninia durasaun tempu to’o de’it fulan-neen, ne’ebé durante hala’o estájiu sei hetan mós apoiu subsídiu osan transporte kada fulan ba estajiáriu ida hamutuk $150,” nia akresenta.
Programa ne’e realiza ba estudante non bolseiru sira atu ajuda hasa’e koñesimentu no abilidade hodi prepara ba futuru, nune’e bainhira ramata programa karik bele iha esperiénsia.
“Maibé FDCH sei la fó garantia ba sira katak hafoin estájiu ramata sei hetan serbisu, tanba ne’e filafali ba sira rasik. FDCH apoiu de’it fundu no prepara kondisaun ba sira,” nia tenik.
Hafoin estájiu ramata, kontribuasaun programa depende ba Orsamentu Jerál Estadu (OJE) 2023, tanba programa ne’e la’os permanente maibé temporáriu de’it.
“Ami labele fó garantia katak programa ne’e bele kontinua tan iha futuru, maibé bainhira kontinua mós seidauk bele garante númeru benefisiáriu atu mantein signifika bele sa’e ou bele tuun,” Diretór Ezekutivu dehan.
Jornalista : Tomé Amado
Editora : Julia Chatarina
