Governu sensibiliza Lei Ordenamentu Territóriu ba entidade RAEOA
OÉ-CUSSE, 25 agostu 2022 (TATOLI) – Governu liuhosi Ministériu Planu Ordenamentu (MPO) kuarta ne’e sensibiliza dekretu lei númeru 6/2017, loron 19 fulan abríl, kona-bá baze Ordenamentu Territóriu rejime komplementár ba entidade sira iha Rejiaun Administrativa Espesiál Oé-Cusse Ambeno (RAEOA).
Diretór Jerál Ordenamentu Territoriál, Deolindo da Silva, hateten, sensibilizasaun ne’e fokuliu ba Lei númeru 6/2017, 19 abríl, kona-bá baze Ordenamentu Territóriu no rejime komplementár sira hanesan rejime instrumentál no planeamentu territoriál ba klasifikasaun rejime kualifikasaun nomoos edukasaun ba dezenvolvimentu.
Tanba bazea Programa VIII Governu Konstitusional kona-bá boa-governasaun iha setór territórialn ne’ebé determina hanesan prioridade Governu ida-ne’e ninian, implementa lei baze númeru 6/2017, Planu Ordenamentu sai mós hanesan instrumentu ba planeamentu iha nível rejionál no munisipál.
“Objetivu hosi sensibilizasaun ne’e rasik maka atu difine no forma ekilibrada no estratéjiku kona-bá utilizasaun no pasu ida kona-bá dezenvolvimentu ba atividade públiku no privada sira, ida-ne’ebé sustentável, tanba haree hosi aspetu ekonomia, sosiál, kultura no alimentaun ninian,” Deolindo da Silva, ko’alia iha salaun Alfándega Palaban, Oé-Cusse.
Prezidente Autoridade RAEOA, Arsénio Paixão Bano, informa, dekretu lei ne’e, iha artigu 30 fó dalan ba RAEOA atu prepara Planu Ordenamentu Rejionál, planu rejionál nian no planu sira uza rai atu implementa iha RAEOA sei aprova hosi dekretu lei Guvernu nian, liuhosi proposta autoridade rejiaun nian.
“Ko’alia kona-bá asuntu ordenamentu territóriu importante tebes, natar labele ateru tanba fó impaktu ba futuru kuandu bee-dalan laiha maka sei akontese bee-sa’e iha vila laran, tan ne’e ha’u aviza ona iha Unidade Territóriu Kadastru no Terra Propriedade halo ona sosibilizasaun hodi fó hatene ba komunidade iha suku tolu ne’ebé hela besik lagoa sira iha pante Makasar, atu labele ateru área Lagoa no tesi ai-parapa iha lagoa ninin,” nia katak.
Nia informa, bazea ba dadus 2013 lagoa Oébau to’o Oéupu suku Costa, nia área metru 926.079 maibé iha 2021 bainhira overlay ba mapa satellite 2013 nia luan área menus ona ba metru 857.217. tan ne’e, tuir konkluzaun katak área lagoa sira menus ona ektare 7.
Alinde ida ne’e mós, autoridade RAEOA liuhosi departamentu ambientál halo ona sensibilizasaun kona-bá tesi-ai no sunu-rai, kria mós tara bandu ba bee-matan, foho sira inklui fatin lulik sira, husik distánsia minimál metru 500, nune’e autoridade mós hari’i kuadru aviza iha área protejida, ne’eb’e risku ba dezastre naturál iha territóriu RAEOA.
Jornalista: Abílio Elo Nini
Editór: Evaristo Soares Martins
