DILI, 25 agostu 2022 (TATOLI)— Polisia Nasionál Timor-Leste (PNTL), Komandu Munisipiu Dili, liuhosi Unidade Seksaun Tránzitu, konsege detein sidadaun nain-haat ho inisiál LF, MS, ND no FC, tanba viola kódigu Estrada ka lori motor, maibé laiha dokumentu komprovativu hanesan karta kondusaun.
“Ita detein suspeitu nain-haat ne’e iha área portu Dili nian, iha tersa (23/8), kalan bainhira ita halo pasa revista ba motorizada no arma branka. Ita halo ona detensun ba suspeitu sira hodi kumpre oras 72, antes aprezenta ba Ministériu Públiku hodi submete interrogatóriu dahuluk iha Tribunál Distritál Dili (TDD)” hateten Komandante PNTL Munisípiu Dili, Superintendente Xefe Henrique da Costa ba jornalista sira liuhosi konferénsia imprensa ne’ebé hala’o iha Komandu PNTL Caicoli, kinta ne’e.
Nune’e, Superintendente Xefe, husu ba sidadaun sira ne’ebé kondús motór no karreta labele haluhan lori karta kodusaun, kontrola asesoria motór sira hanesan lampu, espellu no garante kondisaun veíkulu.
“Ita hatene katak, asidente tráfegu ne’ebé maka akontese iha Dili ne’e ita bele hateten katak 40% sira laiha karta kodusaun,” nia afirma.
Daudaun, PNTL kontinua halo operasaun ba veíkulu sira no halo mós operasaun ho tipu la’o ain iha tempu kalan, nune’e bele kontrola situasaun nune’e povu bele livre no sente seguru.
“Ita husu ba sidadaun se deit iha kareta ho motór bainhira viajen respeita lei kódigu estrada, se bainhira kondus motór tenke uza kapasete, atu bele salva imi nia vida ka tau importasia ba seguru da vida, tanba ita ema la faan hanesan kareta ho motór, mate ne’e hotu ona,” nia ekoraja.
Tuir dadus estatístika hahú hosi fulan-janeiru to’o agostu, Polisia Nasionál Timor-Leste (PNTL), rejista kazu asidente trafégu iha territóriu nasionál hamutuk 1.811, hosi númeru ne’e na’in-61 mak lakon vida.
Hosi totál kazu asidente tráfegu 1.811 ne’e kompostu hosi kanek grave 289, kanek kamaan 1.522 no óbitu na’in-61
Jornalista: Natalino Costa
Editór : Florencio Miranda Ximenes
