iklan

COVALIMA, SAÚDE

Maiu-agostu: Sentru Saúde Fatululik rejista moras IRA 152

Maiu-agostu: Sentru Saúde Fatululik rejista moras IRA 152

Xefe Sentru Saùde Fatululik, José da Cruz. Imajen Tatoli/Celestina Teles.

COVALIMA, 25 agostu 2022 (TATOLI)–Xefe Sentru Saúde Fatululik, José da Cruz, informa hahú hosi fulan-maiu to’o fulan-agostu tinan ne’e, Sentru Saúde Fatululik rejista kazu moras Infesaun Voias Respiratóriu Aguda (IRA/ISPA) hamutuk 152.

“Bazea ba dadus ne’ebé mak ami rekolla iha ita-nia postu saúde Fatululik, hahú hosi maiu to’o agostu, hatudu katak moras Infesaun Vias Respiratóriu Aguda (IRA) hamutuk 152, tuir mak moras kulit 26, tee-been 15, tee-been hoi raan lima (5), pneumonia tolu (3), isin katar kaskadu ida (1) no hosi moras sira-ne’e moras IRA mak aas liu,” José da Cruz hato’o ba Agência Tatoli, iha nia kna’ar fatin, Sentru Saúde Fatululik, suku Taroman, kinta ne’e.

Pasiente ne’ebé mak infetadu moras IRA tanba mai ho tempu klima tanba agora hanesan udan no rai malirin no rai-rahun barak, ho nune’e halo pasiente sira infetadu ba moras IRA ne’ebé aumenta.

Atu halo prevensaun ba moras IRA ne’e tenke hamos ambiente ida-idak nia uma no viajen tenke uza máskara, nune’e komunidade labele afetadu ba moras IRA.

Komunidade Angelina do Carmo hateten, atu halo prevensaun ba moras Infesaun Vias Respiratóriu Aguda (IRA) pesoál saúde Fatululik halo ona promosaun, tanba ne’e bainhira atu viajen komunidade sempre uza máskara

“Ita-nia pesoál saúde sira iha postu saúde Fatululik halo ona promosaun bazea ba dadus ne’ebé moras IRA aas iha sentru saúde Fatululik,” nia dehan.

Moras Infesaun Vias Respiratória Aguda (IRA)

Moras infesaun Vias Respiratória Aguda (IRA) mak infesaun viral (infeksaun ne’ebé kauza hosi virus) ne’ebé akontese iha ita-nia dalan iis nian. Bainhira ita dada iis anin sei halai tuir ita-nia dalan iis nian antes to’o iha pulmaun. Normalmente ita-nia dalan iis hahú ka forma hosi Inus, Kavidade nasal (inus kuak), faringe no laringe (kanál rua ne’ebé nia lokalizasaun iha kakorok).

Anin sei pasa hosi dalan-isin hirak ne’e molok tama ba traqueia no pulmaun. Infesaun ne’ebé akontese iha ita-nia dalan-iis sei provoka ka halo ita sente susar no la konfortavél bainhira dada iis, no nu’udar konsekuénsia sei halo ita-nia isin falta anin hodi hala’o nia funsaun ho di’ak. Moras ida-ne’e fasil tebes da’et no fasil tebes atu kura.

Kauza hosi Infesaun Vias Respiratória Aguda

Moras IRA kauza hosi virus no bakteria ne’ebé invade diretamente ita-nia dalan iis liuhosi matan, inus no ibun. Virus sira-ne’ebé hamosu moras ne’e mak hanesan Rhinovirus, Coronavirus, Virus parainfluenza, no adenovirus.

Fatór sira-ne’ebé kontribui hetan moras IRA

Fatór sira-ne’ebé kontribui atu hetan moras IRA mak hanesan (1) Relasaun ho Individu; Laabarik sira-ne’ebé la simu imunizasaun, bebé ne’ebé la hetan susu hosi inan, bebé no labarik sira menór ho idade tinan ida, sistema imunolojia fraku (daya tahan tubuh lemah), má nutrisaun, moras krónika, ijiéne pesoál ne’ebé la di’ak.

Relasiona ho Ambiente mak; Mudansa temperatura ambientál, poluisaun (rai-rahun), asinamentu (kepadatan, overcrowding), falta ventilasaun iha uma, fumadór barak (su’ar hosi sigaru bele hasa’e insidénsia ba moras ne’e) no ahi-su’ar.

Transmisaun

Moras Infesaun Vias Respiratória Aguda (IRA) transmite ka da’et liuhosi kontaktu direta (koali’a, fani, kabeen) ho ema ne’ebé hetan tiha ona moras ne’e.

Sintóma

Moras Infesaun Vias Respiratória Aguda (IRA) sei hatudu sinál no sintóma hanesan; Inus been turu no suli ka inus metin, me’ar (me’ar maran), isin kolen ka baruk, isin manas (dalaruma), garganta moras, no ulun moras (dalaruma).

Tratamentu

Tratamentu ba iha moras infesaun vias respiratória aguda (IRA) iha oin rua (2) mak tratamentu medikamentoza (ho aimoruk) no tratamentu non-medikamentosa (la uza ai-moruk).

Tratamentu medikamentoza (ho aimoruk): médiku sira mak sei fó aimoruk bainhira ita ba hala’o konsulta iha sentru saúde ka iha ospitál. Tratamentu non-medikamentoza (tratamentu la ho ai-moruk): tratamentu ne’ebé prátiku no ita bela halo hanesan suas ho bee manas nia su’ar, hemu bee no jus barak, deskansa barak no selu-seluk tan.

Prevensaun

Moras infesaun vias respiratória fasil tebes atu kona ema maibé fasil tebes mós atu prevene, sé ita iha konsiénsa no kultura saudavel. Asaun ka hahalok sira-ne’ebé ita tenke halo hodi prevene moras ne’e mak hanesan; fase liman ho sabaun, hadook aan hosi ahi-su’ar no rai-rahun, taka inus no ibun bainhira fanin ka me’ar, susu-been ekskluzivu ba bebé foin moris to’o fulan neen (6), labele fuma besik, halo vasinasaun, no kuidadu ijiéne pesoál.

Jornalista : Celestina Teles

Editór      : Cancio Ximenes

iklan
iklan

Leave a Reply

iklan
error: Content is protected !!