DILI, 25 agostu 2022 (TATOLI)— Polisia Nasionál Timor-Leste (PNTL), Komandu munisípiu Dili, detein suspeitu nain-rua ho insiál SDF (tinan 44) no JM (tinan 42), tanba deskonfia envolve kazu burla agravadu.
Ekipa konjunta liuhosi PNTL eskudra Dom-Aleixo no Serbisu Intelijénsia Makikit, iha Kinta (25/08), tuku 06:00, dadeer, konsege halo identifikasaun no detensaun ba autór na’in-rua ne’ebé deskonfia envolve kazu kazu burla agravadu ka lori lian falsu ba sidadaun sira iha área Dom-Aleixo ninian hodi kobra osan no dokumentu sira.
“Ekipa Konjunta detein suspeitu nain-rua ho insiál SDF no JM tanba deskonfia envolve kazu burla agravadu ka bosok ema hodi hatama osan ho kada ema hatama osan $10, inklui husu atu hatama mós dokumentu sira hanesan Sertidaun RDTL ho foto koloridu, atubele hetan apoia hosi Ministériu Solidaridade Sosiál no Inkluzaun (MSSI) atu had’ia sira nia moris,” Komandante PNTL munisípiu Dili, Superientidente Xefe Henrique da Costa hateten ba jornalista sira liuhosi konferénsia imprensa ne’ebé hala’o iha Komandu jerál PNTL Caicoli, kinta ne’e.
Vítima ba suspeitu na’in-rua kuaze na’in-200-resin no vítima hirak maioria hosi Rejiaun Administrativu Espesiál Oé-Cusse no Ambeno (RAEOA) ne’ebé hela iha kapitál Dili no iha hela Oé-Cusse.
Durante ne’e, vítima sira hein promesa ne’e, maibé la sai realidade, nune’e vítima sira bá hato’o keixa ba PNTL liuhosi Polísia Investigasaun Komandu Munisipiu Dili hodi buka tuir suspeitu sira no konsege halo detensaun no apreensaun.
Nune’e, ekipa konjunta ba halo detensaun no aprrensaun iha detensaun ba suspeitu nain rua PNTL detein osan $90 no dokuementu hanesan kartaun eleitora,sertidaun moris ne’ebe maka durante vitima sira hatama ona.
Liga ba kazu ne’e, PNTL mós identifika autór ka suspeitu ida tan,maibé dadaun nia ba ona Manufahi, nune’e parte Komandu Dili koordena ona Komandu PNTL Manufahi atu detein hodi lori mai Dili atu submete ba prosesu investigasaun iha Komandu Dili.
“Kazu ne’e sei iha hela prosesu investigasaun ita kontinua buka no dezenvolve sé de’it maka envolve iha kazu ne’e rasik sei halo detensaun hodi resposabiliza nia aktu,” nia afirma.
Daudaun, investigadór hosi Eskuadra Vera -Cruz halo ona investigasaun ba suspeitu sira no halo ona kontaktu Ministériu Públiku (MP) atu submete interrogatóriu dahuluk hafoin kumpre oras 72.
“Suspeitu nain-rua ita detein ona iha sela komandu PNTL Dili, hodi kumpre oras 72, antes ita aprezenta ba Ministériu Públiku, hodi submete ba Primeiru Interrogatóriu iha Tribunál Distritál Dili,” katak Superientidente Xefe Henrique.
Jornalista: Natalino Costa
Editór : Florencio Miranda Ximenes
