PNTL realiza semináriu ba membru femenina iha Baucau
BAUCAU, 25 agostu 2022 (TATOLI) – Komandu Polísia Nasionál Timor-Leste munisípiu Baucau, kinta ne’e, realiza semináriu planu asaun jéneru hamutuk na’in-50 kona-ba papél polísia femenina.
Komandante PNTL Baucau, Superintendente António de Sá, esplika, semináriu refere hanesan parte preparasaun lideransa polísia feto atu asume kargu topu hanesan komandante jerál no munisípiu iha futuru.
“Semináriu ida-ne’e ita-nia membru Polísia femenina sira kontinua partilla esperiénsia ba malu atu alkansa objetivu serbisu PNTL femenina nian,” Komandante PNTL Baucau hateten iha vila nova, kinta ne’e.
Semináriu refere koalia mos kona-ba papél polísia femenina hanesan pilar inportante partisipasaun iha misaun Nasoens Unidas (UN) iha rai-liur, halao funsaun kna’ar no partisipasaun liuhosi prepara-aan sai lideransa iha futuru.
Nune’e mós kna’ar polísia feto kona-ba violénsia doméstika ne’ebé asume hosi Polísia femenina.
António de Sá konsidera importante tebes involvementu Polísia femenina iha nasaun dezenvolvidu, liuliu nasaun Timor-Leste ne’ebé foin ukun-aan hanesan liuhosi semináriu bele partilla informasaun, fahe esperiénsia iha rai-li’ur nune’e adapta tuir situasaun reál iha Timor-Leste.
“Iha Baucau ita kompara ho munisípiu seluk, Polísia femenina iha Baucau mak barak liu hamutuk 52,” António de Sá akresenta.
Komandu PNTL Baucau daudaun ne’e liuhosi justisa lideradu hosi polísia femenina, enkuantu komandante ekuadra no seksaun sei okupa hosi polísia mane.
Entretantu, semináriu refere realiza durante loron-rua, ne’ebé sei ensera iha loron 26 agostu ho matéria inportante hanesan preparasaun planu tinan-2022 no 2023, preparasaun planu kona-ba partisipasaun polísia femenina iha atividade PNTL.
Jornalista : Natalino Belo
Editór : Evaristo Soares Martins
