PNTL sei realoka komunidade okupa kazerna PNTL Baucau
BAUCAU, 25 agostu 2022 (TATOLI) – Komandu Polísia Nasionál Timor-Leste Munisipiu Baucau planeia realoka komunidade ne’ebé okupa rai no uma estadu iha areadór PNTL.
Komandante PNTL Baucau, Superintendente António de Sá, hateten, iha loron kuarta 24 agostu realiza enkontru ho komunidade ne’ebé okupa uma hamutuk 43 iha areadór PNTL nian hodi informa kona-ba planu realokasaun tanba sei konstrusaun foun ba kazerna membru PNTL iha tinan-2023.
“Atu antesipa prevene labele mosu dezentendimentu no deskontentemente entaun papél Polísia nia kontinua prevensaun no sosializa ba komunidade ne’ebé okupa karzerna,” Komandante PNTL Baucau hateten iha Vila Nova, kinta ne’e.
Fatin refere nu’udar patrimóniu PNTL nian ne’ebé komunidade hirak-ne’e hela dezde tinan-1999.
Uma refere tempu Indonézia sai kazerna ba membru Polísia Indonézia no durante okupa komuinidade balun konstrui uza osan rasik nune’e liuhosi parte rua hala’o sorumutu atu informa hanesan parte prevensaun, liuliu esplika kona-ba planu PNTL konstrusaun kazerna iha tinan-2023.
Komandante PNTL Baucau orienta komuinidade hirak-ne’e atu konsolida malu inklui akumula dadus kona-ba durante okupasaun rai estadu iha areadór PNTL Baucau.
“Sira tenke organiza-aan hodi prepara protavós ida atu akumula sira-nia difikuldidae,” António de Sá akresenta.
PNTL Baucau rejista preokupasaun no lamentasaun inklui ezijénsia hanesan presiza estadu tau matan ba okupante sira hanesan kria kondisaun ho dignu.
António de Sá husu atu sidadaun hotu tenkevkoopera hanesan kumpre devér hodi kontribui estadu liuliu institusaun PNTL.
Antes ne’e, komandu jerál PNTL rasik delega inspesaun jerál liuhosi diretór nasionál planeamentu identifika Ona uma hirak-ne’e no deside ba planu konstrusaun kazerna ba membru PNTL iha tinan-2023.
Jornalista : Natalino Belo
Editór : Evaristo Soares Martins
