iklan

COVALIMA, POLÍTIKA

Covalima komemora konsulta populár ho kari aifunan iha monumentu Setembru Negro

Covalima komemora konsulta populár ho kari aifunan iha monumentu Setembru Negro

Sítiu Istóriku Monumentu Masakre Setembru Negro iha Suai-Covalima ne’ebé sei inaugural iha loron 20 setembru 2020. Imajen/Facebook: Otelio Ote.

COVALIMA, 26 agostu 2022 (TATOLI)–Reprezentante Administradór Munisípiu Covalima, Francisco de Jesus Alves informa, populasaun munisípiu Covalima sei komemora loron konsulta popular ba dala-XXIII ho atividade limpeza jerál, marsa saudavél, misa agradesimentu no kari aifunan iha monumentu Stembru Negro.

Notísia Relevante: PR Horta sei prezide serimónia komemorasaun loron konsulta populár

Sekretáriu Administrasaun Munisípiu Covalima, Francisco de Jesus Alves. Imajen Tatoli/Celstina Teles.

“Atu komemora loron konsulta populár, ita forma ona komisaun hodi selebra loron konsulta popular limpeza jerál, sei hala’o marsa saudavél no misa agradesimentu, hafoin sei kari aifunan iha monumentu setembru negro,” Francisco de Jesus Alves hateten ba Agência Tatoli bainhira partisipa serimónia tara no bandu iha postu administrativu Fatululik, munisípiu Covalima, sesta ne’e.

Komemorasaun loron konsulta populár 30 agostu ne’e, Governu foti tema “Ho espiritu loron konsulta popular 30 agustu 1999 mai ita hametin pás no estabilidade ba dezenvolvimentu iha ita-nia rai Timor-Leste”.

“Ha’u hanoin tema ida-ne’e relevante duni ho situsaun, tanba ita ukun-an tinan 20 ona, ita presiza hametin pás no estabilidade iha ita-nia nasaun, atu nune’e bele lori dezenvolvimentu iha rai-ida ne’e ba oin, nune’e ema hotu tenke kria pás iha nia-an, iha nia família, postu ho Munisípiu,” Autoridade Munisípiu Covalima ne’e hateten.

Tanba politíka agora sentraliza no kompeténsia balun mak fó ona mai munisípiu ne’ebé prepara ona rekursu umanu, maibé iha parte balun kontinua fó motivasaun ba jerasaun foun sira nune’e eskola hili liu área tekniku enjinária IT no konstrusaun sivíl.

Timor-Leste komemora ona loron konsulta popular ba dala-XXIII, maibé haree ba dezenvolvimentu la’o seidauk bele dehan sufisiénte, presiza atu hadi’a hanesan komunidade iha aldeia balun seidauk asesu eletrisidade, estrada ba área rurál no estrada hosi munisípiu ba nasionál seidauk di’ak.

“Dezenvolvimentu ita bele dehan seidauk sufisiénte maibé Governu kontinua nafatin hala’o dezenvolvimentu iha ita-nia munisípiu Covalima,” nia dehan.

Jornalista : Celestina Teles

Editór       : Cancio Ximenes

iklan
iklan

Leave a Reply

iklan
error: Content is protected !!