OÉ-CUSSE, 26 agostu 2022 (TATOLI) – Xefe Estadu Maiór, FALINTIL-Forsa Defeza Timor-Leste (F-FDTL), Tenenete Jenerál, Falur Rate Laek, informa, iha futuru sei destaka Forsa armada kompañia independente ho estatutu autónomu iha Rejiaun Administrativa Espesiál Oé-Cusse Ambeno.
Nune’e Tenenete Jenerál, Falur Rate Laek, sei fó instrusaun ba komandante komponente navál atu komunika postu destakadu iha Oé-Cusse, atu koloka ona iha edifísiu foun ne’ebé Governu halo ona.
“Planu iha futuru sei destaka kompañia ida, maibé iha faze dahuluk sei koko pelutaun ida, depois iha rekrutamentu, ami sei reforsa, nomoos sei halo kompañia independente ne’e ho nia estatutu autónomu, tenke iha kompañia apoia lojístika no vokasionadu hanesan kapitaun iha portu, aeroportu no buska salvamentu iha tasi nian, ida-ne’e tenke iha hotu, ida-ne’e mak ita hanoin ba futuru,” Falur Rate Laek, informa ba jornalista sira, hafoin inaugura edifísiu F-FDTL iha Oé-Cusse, sesta ne’e.
Nia apela, komandu fó instrusaun destaka iha Oé-Cusse atu serbisu hamutuk ho komunidade, tenke promove instituisaun nia imajen hatudu hahalok di’ak ba komunidade nia leet nune’e bele fó tulun malu iha alimentasaun nian.
“Ha’u hanoin F-FDTL hetan previleiju hetan tán infraestrutura instalasaun apoiu destaka postu independente autónomu iha RAEOA ninian, ohin empreza entrga xave ba Ministru Defeza no entrega ba forsa armada, ne’e signifika kresimentu forsa nian,” afirma Falur Rate Laek.
Ministru Defeza, Filomeno da Paixão de Jesus, hatete, fasilidade ba postu iha Oé-Cusse sufisiente atu uza ba serbisu Estadu nian ba iha komunidade.
“Postu iha Oé-Cusse ne’e boot, ha’u haree iha futuru kompañia ida bele hela iha ne’e, atu asegura no fó seguransa ba ita-nia soberania Timor-Leste liu-liu iha Oé-Cusse,” nia katak.
Notísia relevante: Ministru Defeza inaugura edifísiu F-FDTL iba RAEOA
Jornalista: Abílio Elo Nini
Editór: Evaristo Soares Martins
