BOBONARO, 26 agostu 2022 (TATOLI)-Xefe sentru saúde postu administrativu Cailaco, munisípiu Bobonaro, Delfim Bere, husu Ministériu Saúde (MS) aumenta motorista karreta ambulánsia multi-funsaun iha sentru ijiene komunitária (CHC, sigla portugés) Cailaco, hodi fasilita médiku sira halo atendimentu ba pasiente sira ho di’akliu.
Delfim haktuir, daudaun ne’e motorista ne’ebé konduz karreta multi-funsaun na’in ida de’it, ne’e duni labele atende hotu kazu emerjénsía sira-ne’ebé ligada ba ema-nia vida.
Preokupasaun ne’e parte Jestór CHC sempre hato’o beibeik ba servisu saúde munisípiu Bobonaro atu aprezenta ba Ministériu Saúde maibé to’o agora seidauk hetan rezultadu ruma.
Notísia relevante: Estudante iha Cailaco 90% kompleta ona vasina Pfizer
“Hau rekomenda, karik bele driver ne’e rua, atu nune’e ida moras ka lisensa ida bele taka fali, atu ita-nia komunidade labele akontese buat-ne’ebé ita la espera,” nia informa ba jornalista-sira, iha knaar-fatin, sesta ne’e.
Nia dehan, motorista ida-ne’ebé Governu rekruta iha tempu liubá mak durante ne’e konduz karreta multi-funsaun ida hodi halo atendimentu livre serbisu administrasaun,tula pasiente no serbisu seluk tán.
Delfim informa, motorista na’in ida-ne’e mós hanesan funsionáriu públiku ne’ebé iha direitu atu foti lisensa bainhira moras no nesesidade sira seluk tuir lei haruka, entaun bainhira nia lisensa difikulta jestór sira buka alternativu hodi subtitui ema seluk, liuliu akontese kazu emerjénsía.
“ida-ne’e bazeia ba job, ezemplu ha’u nuudar enfermeiru ida, kolega balu enfermeiru, parteira no doutór balu, ita bele asume jobne’e, maibe driver ida ne’e liga liu ba ema-nia vida, entaun bainhira akontese buat ruma ita tenke bazea ba servisu idak-idak,” nia hateten.
Pesoál saúde ne’ebé haknaar-aan iha sentru saúde Cailaco komposta hosi médiku, enfermeiru, tékniku aliadu sira no seluk tán hamutuk na’in-45.
Notísia relevante: MSSI lansa programa Bolsa da Mãe jerasaun foun iha Cailaco
Jornalista: Sérgio da Cruz
Editór: Evaristo Soares Martins
