DILI, 26 agostu 2022 (TATOLI)—Diretór Ministériu Solidariedade Sosiál no Inkluzaun (MSSI), Florencio Pina Dias Gonzaga, hateten subsídiu benefisiáriu ba programa bolsa da mãe jerasaun atuál kondisioál ba faze dahuluk ba tinan 2022 iha teritórriu Timor-Leste hamutuk 45,836 ne’e Governu prevee $5,394.120.
Notisia Relevante: Benefisiáriu bolsa da mãe atuál rejistu iha MSSI hamutuk 45.836
“Subsídiu ba benefisiáriu 45.836 ne’e, ita prevee osan hamutuk $5,394.120,” Diretór Jerál ne’e informa ba Agência Tatoli, iha nia kna’ar fatin MSSI, Caicoli, Dili, sesta ne’e.
Totál benefisiáriu ne’e kompostu hosi munisípiu Aileu hamutuk 2,556 ho nia osan $310,740; Ainaro 3,300 ho nia osan $397,320; Baucau 4,482 ho nia osan $504,180; Bobonaro 4,199 ho nia osan $522,480; Covalima 3,610 ho nia osan $390,780; Dili 5,394 ho nia osan $625,080.
Benefisiáriu iha Ermera hamutuk 3,246 ho nia osan $406,860; Lautém 3,129 ho nia osan $397,800; Liquiça 3,238 ho nia osan $384,240; Manatuto 2,520 ho nia osan $296,220; Manufahi 3,098 ho nia osan $369,900; Rejiaun Administrativa Espesiál Oé-cusse Ambeno (RAEOA) 4,227 ho nia osan $445,740 no Viqueque 2,837 ho nia osan $342,900.
Programa ne’e, tuir planu MSSI sei realiza iha fulan-agostu ne’e maibé fila-fali ba Banku Nasionál Komérsiu Timor-Leste (BNCTL) nia kalendáriu.
“Polítika ne’e ita servisu hamutuk ho BNCTL mak halo pagamentu maibé ita-nia alvu ne’e halo pagamentu iha agostu maibé tarde liu iha setembru nia-laran no iha tempu badak MSSI sei taka lista benefisiáriu sira-nia naran ba Sentru Solidariedade Sosiál iha munisipál sira,” nia dehan.
Jornalista : Osória Marques
Editór : Cancio Ximenes
