iklan

EKONOMIA, BAUCAU, HEADLINE, MUNISÍPIU

MTKI lansa kompetisaun negósiu inovativu iha Baucau

MTKI lansa kompetisaun negósiu inovativu iha Baucau

BAUCAU, 26 agostu 2022 (TATOLI) – Governu liuhosi Ministériu Turizmu, Komérsiu no Indústria (MTKI) sesta ne’e, lansa kompetisaun negósiu inovativu hosi munisípiu haat iha Baucau.

Vise-Ministru Turizmu, Komérsiu no Indústria, Domingos Lopes Antunes, hateten, kompetisaun refere atu enkoraja no motiva emprezáriu lokál iha munisípiu haat hanesan Baucau, Lautém, Manatuto no Viqueque, atu iha negósiu inovativu no kria empregu ba komunidade sira hodi haburas ekonomia iha baze.

“Hosi kompetisaun negósiu ne’e, Governu ida-ne’e kompromete nafatin atu harii fali ekonomia rai ida-ne’e nian, ne’ebé forte no reziliente,” Gobernante ne’e ko’alia iha Sentru Konvensaun Baucau (CCB, sigla portugés).

Programa refere parte hosi kontinuasaun hosi kompetisaun inovativu ne’ebé hala’o ona iha tinan-2021 no 2022 ne’ebé prodús ona emprezáriu hamutuk 44 komposta Josi 29 hosi kompetisaun dahuluk no 15 hosi kompetisaun faze daruak ho totál orsamentu rihun $300.

VIII governu kompromete nafatin atu harii ekonomia ne’ebé forte no lakohi hatoman emprezáriu sira no povu ho subvensaun públika, maibée tenki kria responsabilidade atu hetan apoia hosi governu karik tenki esforsu no iha retornu ba komunidade atu eleva iha setór ekonomia.

“Ida-ne’e impaktu boot ba ita-nia ekonomia, apenas, difikuldade barak ne’ebé ita enfrenta inklui pandemia Covid-19 no inflasaun iha rai-laran tanba funu Ukraína halo folin sasán sa’e, ne’ebé afeta tebes ekonomia rai-laran,” Domingos akresenta.

Objetivu hosi kompetisaun mak atu haburas, promove no hasa’e kresimentu ekonomia lokál, promove produtividade no haburas setór produtivu sira hanesan agrikultura no peska, fornese kampu serbisu inklui hakbi’it empreza lokál sira.

Prioridade ba kompetisaun planu negósiu sei foka ba área produtivu sira hanesan agrikultura, peska, turismu no indústria ne’ebé sei fó vantajen ba emprezáriu mikro, pekenas no médiu, kooperativa no grupu joven sira hodi hetan insentiva hanesan ekipamentu ne’ebé presiza.

Tuir planu manán-na’in sei hetan ekipamentu ka materiál ba negósiu ho valor orsamentu rihun $1 to’o rihun $10.

Kritéria importante ba kompetitór sira mak hanesan, joven feto-mane idade 18 to’o 35, joven ne’ebé iha ideia negósiu inovativu iha setór produtivu, atividade negósiu tenke lokaliza tuir munisípiu haat no foin sa’e sira-ne’ebé hahú ona atividade negósiu.

Programa refere MTKI hala’o serbisu hamutuk ho autoridade munisipál haat, PNUD, KOICA no Institutu Apoia Dezenvolvimentu Emprezárial (IADE) ne’ebé sei remata rejistu iha loron-16 fulan-setembru.

Prezidenti Autoridade Munisipál (PAM) Baucau, Olívio ‘Bou-Lesa’ Freitas, hateten, programa refere hamosu ona estrela negosiantes iha nível nasionál nune’e juventude sira tenke brani no sai eroi foun ba Timor-Leste.

“Foin sa’e sira nu’udar motór dezenvolvimentu ba nasaun doben ida-ne’e nian,” Bou-Lesa hateten.

Bou-Lesa enkoraja juventude sira hosi munisípiu haat ne’ebé sei hola parte iha kompetisaun atu esplora hanoin ne’ebé inovativu, liuliu transformasaun ai-haan lokál atu futuru hola parte iha merkadu i denternasionál nune’e bele motiva agrikultór sira.

Jornalista   : Natalino Belo 

Editór          : Evaristo Soares Martins

iklan
iklan

Leave a Reply

iklan
error: Content is protected !!