UPF halo apreensaun ba belak 494 iha Palaka
DILI, 26 agostu 2022 (TATOLI)— Unidade Patrullamentu Fronteira (UPF), iha postu Tunubibi, kinta (25/08), hala’o operasaun la’o ain no konsege halo apreensaun ba sasán kulturál ho tipu Belak hamutuk 494, iha área besik Ponte Nunura Palaka, postu administrativu Maliana, Munisípiu Bobonaro.
“Bainhira komunidade sira tenta halo transaksaun ilegál iha área mota laran, ekipa UPF postu Tunubibi halo kedan apreensaun ba sasan kulturál sira no suspeitu ka na’in ba objetu hirak ne’e halai lakon,” refere nota ne’ebé Agência TATOLI asesu, sesta ne’e.
Sasán kulturál ne’ebé ekipa halo apreensaun maka belak mean no mutin totál hamutuk 494, kompostu hosi belak mean bo’ot 48, mean médiu 150, mean ki’ik 125. Enkuantu belak mutin bo’ot 16, mutin médiu 80 no mutin ki’ik hamutuk 75.
Daudaun, ekipa UPF kontinua buka tuir suspeitu ka na’in ba sasán kulturál ne’e tanba halai lakon hafoin ekipa halo apreensaun. Nune’e ekipa UPF lori objetu hirak ba UPF iha postu Tunubibi atu asegura.
Jornalista: Natalino Costa
Editór : Florencio Miranda Ximenes
