“Don Virgílio sai Kardeál tanba grasa Maromak nian”
DILI, 27 agostu 2022 (TATOLI)— Reitór Institutu Filosófiku São Francisco de Sales (IFFS), Padre Manuel Pinto, SDB, hateten Don Virgílio do Carmo da Silva, SDB sai Kardeál foun iha Timor-Leste tanba grasa Maromak-nian ba Igreja Katólika Timorense liuhosi Amu-Papa Francisco.
“Ha’u hanoin katak nomeasaun Arsebispu Dili nian ba Kardeál foun ne’e hanesan ba-dala uluk iha istória Igreja Katólika Timor nian, hafoin selebra tinan 500 ezisténsia doutrina katólika nian iha Timor. Ha’u rasik haksolok tebes ho nomeasaun Kardeál foun Timor-Leste nian,” Padre Manuel Pinto hateten ba Agência TATOLI, iha nia servisu fatin Dom Bosco, Comoro, Dili, sesta ne’e.
Ho nomeasaun ne’e, Padre Manuel Pinto fó agradese ba Maromak nia-bensaun no grasa mak Timor-Leste bele hetan Kardeál timor-oan ida.
“Ha’u husu ba sarani katóliku Timor-Leste tomak atu akompaña nia (Don Virgílio) ho orasaun atubele hetan forsa no grasa iha serimónia toma de pose ba Kardeál foun ne’e nian,” nia sujere.
Amu-lulik ne’e mós sente iha haksolok hosi sarani katóliku Timor-Leste nian no husu ba ema hotu atu fó obrigadu ba Maromak ba ninia grasa liuhusi Amu-Papa Francisco.
“Títulu Kardeál ne’e ba ofisiál katóliku Timor-Leste nian, Amu-Papa Francisco fó títulu ne’e ba Kardeál foun sira. Amu-Papa Francisco hili Bispu no Arsebispu hotu ne’ebé hala’o knaar iha kreda,” nia konsidera.
Iha fatin ketak, Reprezenta família Don Virgílio do Carmo da Silva, Manuel do Carmo da Silva, hateten, sentimentu pesoál hanesan maun sente orgullu no agradese tanba entre bispu sira iha Timor-Leste, alin bele reprezenta ona Timór hodi sai Kardeál foun iha Timor-Leste.
“Maibé ida-ne’e la’ós ba privadu nian, ida-ne’e ba sarani no família katólika tomak iha Timor-Leste. Nune’e Parabéns ba sarani, parabéns ba kreda no parabéns ba ita Timor-Leste,” nia agradese.
Nune’e mós Sarani katólika, João Baptista dos Santos, sente kontente bainhira rona Papa Francisco nomea Don Virgílio sai Kardeál foun iha Timor-Leste.
“Ho nomeasaun ne’e atu 90% sarani Katólika iha Timor-Leste bele habelar liután doutrina Maromak nian,” nia afirma.
Entretantu, Joven Timor-Leste, Ernesto Pinto, haktuir hanesan joven ida iha Timor, sente orgullu no kontente tanba bele simu grasa ne’e hosi na’in Maromak rasik maibé liuhusi Papa Francisco hodi nomea Don Virgílio sai Kardeál foun iha Timor-Leste.
“Ha’u-nia sentimentu ida-ne’e, karik reprezentante mós joven balun liuliu ba ita joven katólika Timor-Leste nian kontente no orgullu. Grasa ne’ebé ita-nia Amu Papa haraik ona ba ita-nia Kardeál foun ne’e no fó mós forsa mai ita kontinua moris hanesan sarani katólika ida iha Timor, no iha Sudeste Aziátiku-nian,” nia orgullu.
Jornalista : Osória Marques
Editór : Florencio Miranda Ximenes
