MAE prioritiza kuda ai-oan iha implementa programa “Mão de Obra”
COVALIMA 27 agusto 2022 (TATOLI) – Vise Ministru Administrasaun Estatal (MAE), Lino de Jesus Torrezão, hateten governu implementa programa Mão de Obra iha postu Administrativu (PMOPA) sira iha territóriu nasionál, la’os prióridade de’it ba hamoos baleta no hadi’a estrada, maibé prióridade mós ba kuda ai-oan.
“Ha’u atu hatete Programa Mão de Obra la’o daudaun ona la’ós atu hamoos de’it baleta, maibé atu kuda mós ai horis,” Vise-MAE hato’o asuntu ne’e bainhira partisipa serimónia kultura tara no bandu iha aldeia Lia-na’in, suku Taroman, postu Administrativu Fatululik, sesta ne’e.
Atu kuda ai-horis espsífiku hanesan, iha postu administrativu Maucatar kuda kamii, Ermera kuda ai replantasaun hamohon kafe no kuda kafee, Baucau kuda kulu, Viqueque kuda nuu.
Tanba, implementa PMOPA hanesan programa fó motivasaun ba joven sira hodi fó bemvindu ba dezenvolvimentu, adeus konflitu mak juventude tenke sai autór ba kuda ai, konserva rai iha programa PMOPA.
Implementasaun PMOPA traballadór loron-ida fó osan $5, maibé ba responsavel loron-ida sei hetan osan $7.00.
Antes ne’e, iha loron loron 1 agostu tinan ne’e, reprezentante Administradór munisípiu covalima, Francisco de Jesus alves hateten, implementa programa PMOPA iha munisípiu Covalima ho totál orsamentu $782.000 hosi orsamentu ne’e sei ba postu administrativu hitu ne’ebé faze dahuluk tama ho 50% ekivalente númeru orsamentu $50.000-resin
Tanba, Implementasaun PMOPA iha postu administrativu sira-ne’e prióridade ba halo manutensaun no hamoos esgotu, halo manutensaun ba estrada,hamoos lixu iha fatin públiku, tanba matadalan PMOPA ko’alia klaru katak labele halo konstrusaun foun.
Jornalista: Celestina Teles.
Editór : Florencio Miranda Ximenes
