Estudante konsidera konsulta popular nu’udar prezente ba jerasaun foun
DILI, 29 agostu 2022 (TATOLI)–Estudante Universidade Nasionál Timor-Lorosa’e (UNTL) hosi fakuldade siénsia polítika (FASPOL), departamentu dezenvolvimentu komunitáriu, Venâncio de Carvalho, konsidera loron 30 agostu konsulta popular nu’udar prezente boot ba jerasaun foun sira tanba hosi autodeterminasaun iha tinan 23 liubá maka bele hetan liberdade ba eskola.
“Jerasaun antigu sira simu moruk hotu liuhosi torturasaun, intimidasaun no sofrimentu, ne’ebé husik ona iha tinan 23 liubá. Ami nu’udar jerasaun foun, maski la asiste maibé ami bele sente luta ne’ebé jerasaun antigu sira fó ona ba rai ida-ne’e hodi fó autodeterminasaun ikus ba rai ida-ne’e iha loron 30 agostu 1999,” Estudante ne’e hateten ba Agência Tatoli, iha iha kampus UNTL, Caicoli, segunda ne’e.
Notísia relevante: PR Horta sei prezide serimónia komemorasaun loron konsulta populár
Tuir nia, papél jerasaun foun maka oinsá kontinua valoriza luta iha tempu agora atu fó no kontribui fali saida maka bele halo ba rai ida-ne’e, atu inan-aman maun bin alin sira ne’ebé lakon ona vida ba rai ida-ne’e bele moris hakmatek.
“Jerasaun foun tenke estuda maka’as, tenke kria estabilidade, pás no hakmatek iha rai ida-ne’e liuhosi kooperasaun di’ak ba malu, hadomi malu hamutuk hametin unidade, atu nune’e bele fó biban ba Estadu no Governu bele hadi’a rai ida-ne’e ba futuru ida di’ak liu,” nia akresenta.
Estudante FASPOL ne’e dehan, hanesan jerasaun foun ne’ebé la partisipa iha momentu konsulta populár, maibé nia bele kompreende saida maka loron konsulta populár, nu’udar momentu importante tebes ba maubere-oan tomak determina futuru.
“Konsulta popular mak autodeterminasaun timor-oan atu deside kontinua hamutuk ka haketak-an hosi nasaun okupante viziñu, Indonézia. Ami rona momentu ne’ebá timor-oan hotu ida-idak ba ezerse ninia direitu iha sentru votasaun ne’ebé ONU estabelese ona iha territóriu nasionál, maibé intimidasaun hosi inimigu hamutuk ho ita-nia maluk timor-oan balun ne’ebé lakohi ukun-an kontinua la’o nafatin hodi fó presaun atu labele hili ukun-an,” nia tenik.
Maski nune’e, timor-oan ho aten barani no fiar-an nafatin, maski iha kilat no tudik nia tutun, sira la hakiduk no kontinua avansa hodi fó nafatin votu konfiansa ba independénsia atu lori rai ida-ne’e sai nasaun ida soberanu livre no independente.
Jornalista : Tomé Amado
Editora : Julia Chatarina
