iklan

HEADLINE, MUNISÍPIU, POLÍTIKA, VIQUEQUE

Governu presiza rekoñese povu-nia partisipasaun iha loron konsulta populár

Governu presiza rekoñese povu-nia partisipasaun iha loron konsulta populár

Administrór postu Administrativu Ossu, munisípiu Viqueque, Sebastião Pereira Pires. Imajen Tatoli/Vitorino Lopes da Costa

VIQUEQEU, 30 agustu 2022 (TATOLI)-Administradór postu administrativu Ossu, munisípiu Viqueque, Sebastião Pereira Pires, husu governu no Parlamentu Nasionál kria lei hodi rekoñese no valoriza povu ne’ebé uluk partisipa eleisaun ba determinasaun ukun rasik an.

“Ha’u hanoin Governu no Parlamentu Nasionál presiza kria lei ruma hodi rekoñese povu ne’ebé uluk partisipa iha eleisaun hodi determina ukun rasik-aan. Ita tenke rekoñese sira hanesan mós rezisténsia sira, veteranu halo funu hodi depende ita-nia nasaun, ita-nia populasaun mós determina ita-nia independénsia. Tuir loloos ne’e, rekoñese la’ós hanesan veteranu, maibé fó netik subsídiu ruma ba sira-nia determinasaun”, Sebastião Pereira Pires, hateten ba jornalista Agência Tatoli, iha postu Ossu, tersa ne’e.

Autoridade ne’e reforasa, povu sira-ne’ebé uluk partisipa votasaun ba independénsia nu’udar valór boot ida nasaun Timor-Leste nian liberdade tanba ne’e governu presiza fó subsídiu ba povu nia votu.

“Povu Timor Leste ne’ebé hili ba ukun-aan hamutuk 78,50 %. Tán ne’e, ita presiza fó onra, fó valór no fó sertifikasaun katak ema ne’e mak determina ba ita-nia independénsia. Ho ida-ne’e ha’u prefere Parlamentu Nasionál labele debate de’it eskalaun, pensaun vitalísia sira, ha’u ida ki’ik ne’e hanoin tenke halo rekoñesimentu ba populasuan sira-ne’ebé uluk vota ba independénsia, ita labele rekoñese de’it balun, balun ita haluha sira, ida-ne’e ladún di’ak”, nia fó hanoin.

Tanba povu barani maka iha situasaun difisil nian laran sira ba tuir votasaun hodi hetan independénsia, akontese iha fatin fatin hodi hata’uk povu, maibé povu nafatin ho aten-barani maka ba partisipa iha eleisaun 30 agostu 1999.

“Ha’u haree momentu loron 30 agostu tinan 1999, iha postu Ossu militár Indonézia sira halo movimentu tún sa’e, hodi halo ameasa oinoin ba populasuan sira atu labele partisipa iha eleisaun tanba sira sente katak sira sei lakon iha eleisaun. measa sira-ne’e la’ós akontese iha Ossu, kuaze iha fatin hotu-hotu akontese hanesan”, nia haktuir.

Maibé povu iha esperansa katak dezde tinan 1975 hakarak moris ukun rasik an, ukun rasik an nunka lakon iha povu ninia fuan. Entaun, maske mosu ameasa oinoin povu nunka ta’uk no povu barani tanba FALINTIL iha sira-nia kotuk.

“Nune’e iha momentu ne’ebá forsa FALINTIL iha área Ossu no Uaimori no juventude dewan solidaritas ne’ebé lidera hosi Bendito Freitas iha hotu hodi halo mentaliza ba povu no fó barani ba povu bele mate. Maibé ita tenke ba partisipa vota hodi determina ita-nia destinu nasaun nian. Ho ida-ne’e povu hotu-hotu ba partisipa iha eleisaun. Ikus mai povu Timor ñ-Leste rona rezultadu iha loron 4 setembru konsege manán,” nia teknik.

Enkuantu Konsulta Popular lidera hosi Organizasaun Nasaun Unida liuhosi misaun UNAMET, ne’ebé lidera husi Ian Martin.

Iba fulan-juñu 1999, UNAMET tau tiha ona funsionáriu eleitorál internasionál, polísia no ofisiál milítar ligasaun nian iha Timor-Leste nian iha munisípiu 13.

Votante 451,792 maka rejista-aan no 98.6% hosi sira-ne’e vota iha eleisaun iha 30 agostu 1999. Rezultadu iha 4 fulan-setembru, nune’e 21.5% vota ba autónomia espesiál ho Indonézia no 78.5% rejeita proposta ne’e.

Jornalista : Vitorino Lopes da Costa
Editóra : Evaristo Soares Martins

iklan
iklan

Leave a Reply

iklan
error: Content is protected !!