iklan

HEADLINE, MUNISÍPIU, VIQUEQUE

Joven Viqueque realiza atividade limpeza iha ámbitu komemora loron konsulta populár

Joven Viqueque realiza atividade limpeza iha ámbitu komemora loron konsulta populár

Joven no autoridade lokál sira halo limpeza iha kapitál munisípiu Viqueque, tersa (30/08). Imajen Tatoli/Vitorino Lopes da Costa

VIQUEQUE, 30 agostu 2022 (TATOLI)—Joven Viqueque hamutuk ho autoridade lokál sira ho inisiativa, tersa ne’e, realiza atividade limpeza jerál iha kapitál munisípiu hodi komemora loron konsulta populár ba da-23 (30 agostu 1999-30 agostu 2022).

“Ami halo atidade ne’e hodi hamoos kapitál munisípiu Viqueque laran, tanba nu’udar foin-sa’e ita presiza kontribui ba ita-nia nasaun Timor-Leste,” Joven Viqueque, Marito da Silva, hateten ba Agência Tatoli iha postu Viqueque Vila.

Nia dehan, hanesan jerasaun foun, presiza fó hanoin no kontribuisaun hodi partisipa ba prosesu dezenvolvimentu Timor-Leste atubele hadi’a nasaun.

“Ita presiza mós halo refelesaun ba luta hanesan loron 30 agostu ne’e nu’udar loron ne’ebé importante ba ema hotu hodi selebra no hanoin hikas ba pasadu sira ne’ebé povu Timor-Leste ultrapasa,” nia akresenta.

Notísia relevante: Administrasaun Viqueque realiza jogu futeból festeza loron konsulta populár

Joven ne’e rekoñese, molok Timor-Leste hetan ninia independénsia, iha povu barak maka hasoru dezafiu oin-oin hodi hetan liberdade tomak liuhosi konsulta populár iha loron 30 agostu 1999.

“Ha’u hanoin, loron konsulta populár nu’udar loron importante ba ita hotu, maski iha momentu ne’ebá ha’u la partisipa maibé ha’u sente tempu uluk difísil maibé povu barak maka partisipa hodi determina ita-nia ukun rasik-an,” nia tenik.

Nune’e, nia husu joven Viqueque sira atu kontribui kria pás no establidade iha munisípiu ne’e hodi halakon violénsia.

Atividade limpeza hahú hosi jardín 1959, igreja Ti-lou, kampu futeból demokrasia munisípiu Viqueque no ramata iha sede suku Uma-kiik.

Jornalista   : Vitorino Lopes da Costa

Editora       : Julia Chatarina

iklan
iklan

Leave a Reply

iklan
error: Content is protected !!