DILI, 30 agostu 2022 (TATOLI)— Eis Xefe Estadu Maiór Jenerál FALINTIL-Forsa Defeza Timor-Leste (F-FDTL), Tenente Jenerál Reformadu, Lere Anan Timur, hato’o kongratulasaun ba povu Timor-Leste tanba hahú katuas, ferik no juventude sira nia brani iha konsulta populár 30 agostu 1999, mak deteminasaun ba independénsia ka ukun rasik-aan hodi harii Estadu Repúblika Demokrátika Timor-Leste (RDTL).
“Ha’u hakarak kongratula povu Timor-Leste ne’ebé maka ita, ohin hamutuk komemora loron konsulta populár ba dala-23 tanba liuhusi loron ohin, maka ita afirma ita nia auto determinasaun ka Timor-Leste nia destinu sai nasaun. Povu hatudu brani iha momentu ne’ebá, nune’e ha’u atu dehan eroi maka ita nia povu no juventude,” hateten Tenente Jenerál Reformadu ne’e, hafoin partisipa seremónia lansamentu livru Brigadeiru Jenerál Cornélio Ximenes Maunana ne’ebé ho títulu Maunana Humilde e Revolusionáriu ne’ebé maka hala’o iha Kuartel Jenerál F-FDTL Fatuhada, tersa ne’e.ohin.
Iha ámbitu komemorasaun loron konsulta populár ne’e, tuir Lere katak, hosi povu tomak nia brani iha loron konsulta populár iha loron 30 agostu 1999, maka deside Timor-Leste nia auto determinasaun hodi sai nasaun independente.
Nune’e, Eis Gerilleiru ne’e, husu ba povu Timor-Leste hotu katak Timor-Leste sai ona nasaun independente, maibé presiza hamutuk hodi konstrui nasaun sai nasaun ne’ebé di’ak ba sidadaun hotu atu hetan prosperu ka hetan moris di’ak.
“Ita ne’ebé maka sei moris ita la’ós eroi, maibé atu husu de’t ita hotu katak, ita hotu iha obrigasaun bo’ot atu prense ba ita nia independensia ida ne’e maka tenke hamutuk iha prinsipiu ida ba konstrusaun Estadu no prosperidade, nune’e kontinua dignifika eroi sira ne’ebé fó aan ba mate hodi liberta pátria no povu ida ne’e,” Tenente Jenerál Reformadu ne’e fó hanoin.
Iha fatin hanesan, Konselleiru Sentru Nasionál Chega Institutu Públiku (CNC, I.P sigla Portugés), Padre Juvito do Rego, hateten loron 30 agOstu ne’e loron dezesivu ba povu Timor-Leste tanba atu determina Timor-Leste nia destinu sai nasaun independente iha mundu.
Maibé, Padre Juvito do Rego hateten, nia parte lamenta timor-oan ladun tau importansia ba loron ne’e, tanba la halo selebrasaun espesiál ida hodi komemora loron ne’e.
“30 agostu ne’e loron dezesivu ba povu Timor-Leste, maibé ohin ne’e ema la ladun selebra,” Konselleiru ne’e lamenta.
Tanba ne’e, Padre Juvito do Rego husu timor-oan hotu presiza valoriza loron importante sira hanesan ne’e no valoriza eroi sira nia luta ba prosesu libertasaun nasionál.
“Agora ne’e, tempu to’o ona ita valoriza eroi sira liuhosi selebrasaun sira hanesan ne’e, ita hotu tenke tau importansia ba iha loron sira hanesan ne’e,” Padre Juvito sujere.
Jornalista:Natalino Costa
Editór : Florencio Miranda Ximenes
