DILI, 30 agostu 2022 (TATOLI)–Prezidente Repúblika (PR), José Ramos Horta, hateten, nia parte kontinua halo esforsu atu sai mahon halakon diskriminasaun iha partidu polítiku hotu hodi nune’e bele kria dame iha Timor-Leste.
“Nu’udar Prezidente, ha’u-nia knaar mak buka atu sai mahon ida ba partidu polítiku no sosiedade tomak atu labele iha diskriminasaun polítika no sosiál hodi nune’e bele kria dame atu Timor bele moris kontente,” PR Horta durante serimónia komemorasaun loron konsulta populár ba da-23, iha jardín 05 de maiu, Colmera, tersa ne’e.
Notísia relevante: PR Horta sei prezide serimónia komemorasaun loron konsulta populár
Nune’e, Xefe Estadu daudaun tenta ko’alia ho líder polítiku hotu atu buka rona ida-idak nia hanoin no halo kontaktu ho sira kada loron.
“Dala ruma halo kontaktu privadu no kontaktu ofisiál atu nune’e Timor bele moris iha hakmatek,” nia akresenta.
Xefe Estadu rekoñese, daudaun iha mundu mosu konflitu no funu hanesan iha nasaun Myanmar, Ukraina, Yemen, no Afganistaun ne’ebé halo situasaun difísil tebes inklui iha Pakistaun, Banladés no Srilanka mosu problema polítiku boot, maibé Timor kontinua moris nafatin iha dame tanba ekonomia la’o di’ak nafatin, tanba ne’e hein katak fulan hirak mai ne’e ekonomia Timor bele rekupera filafali.
Aleinde ne’e, nia refere ba komemorasaun loron Konsulta popular tinan ne’e, katak nia prezensa hanesan obrigasaun Estadu, pesoál no sidadaun atu labele haluha momentu ne’ebé povu joven, ferik no katuas sira luta no fakar ran iha tinan lubuk ida nia laran atubele to’o iha aktu referendu.
“Ha’u hakru’uk ba fundadór FRETILIN, ba Komité Sentrál FRETILIN ne’ebé mohu hotu, komandante, sarjentu ofisiál no soldadu sira ne’ebé mate, ha’u mós hakruuk ba juventude ba aswain Santa Cruz, igreja rede klandestina no kaixa, ha’u sempre hakru’uk ba sira hodi hanoin ba sira-nia luta. Tanba ne’e maka ha’u mai marka prezensa iha serimónia ne’e,” nia tenik.
Jornalista : Tomé Amado
Editora : Julia Chatarina
