OÉ-CUSSE, 31 agostu 2022 (TATOLI) – Autoridade Rejiaun Administrativa Espesiál Oé-Cusse Ambeno (RAEOA), lideradu Arsénio Paixão Bano, rekolla taxa ba Kofre Estadu hamutuk $395,739.50 trimestre daruak hosi atividade billete aviaun ZEESM iha aeroportu Rota do Sândalo.
“Ha’u atu informa de’it katak ita-nia taxa rekolla iha aeroportu Rota do Sândalo ba Estadu hamutuk rihun $395,739.50. Reseita ne’e ita rekolla iha trimestre daruak hahú hosi janeiru to’o juñu inklui fulan-jullu nian, ba fula- agostu nian seidauk,” Sekretária Rejionál Asuntu Finansa, Maria Eliza Maniquin, informa ba Agência Tatoli iha Oé-Cusse, kuarta ne’e.
Nia informa, fonte hosi taxa ne’e maioria mai hosi aviaun ZEESM la inklui atividade seluk, tanba aviaun ZEESM halo operasaun kada loron hosi Dili-Oé-Cusse no hosi Oé-Cusse ba Dili ho presu billete iha kategoria tolu.
“Ida-ne’e ita hetan liuhosi billete aviaun hosi Dili mai Oé-Cusse no hosi Oé-Cusse ba Dili, tanba presu billete nian ne’e maka iha kategoria tolu, $50 nian bainhira iha orden serbisu, ba komún $40 no ba labarik nian maka $20,” nia afirma.
Nia fó-sai katak, reseita tinan ne’e sei iha aumenta, kompara ho 2021 tanba situasaun COVID-19, afeta reseita tún, nune’e to’o dezembru 2022 taxa sei sa’e tán.
Jornalista: Abílio Elo Nini
Editór: Evaristo Soares Martins
