CVTL refleta solidariedade umanu liuhosi asaun imparsiál-promove diversidade entre ema
DILI, 31 agostu 2022 (TATOLI)—Sekretáriu Jerál Cruz Vermelha Timor-Leste (CVTL), Luis Pedro, hateten reflesaun solidariedade internasionál ne’e atu refleta asaun voluntáriu ne’ebé komete hosi ema seluk no asaun sira-ne’e tenke imparsiál, neutru, onestu no tenke promove diversidade entre ema.
“Ami komprende katak solidariedade umanu reflete ema-nia sentimentu no asaun voluntariamente hodi apoia, la presiza atu iha diferensa entre sira seluk,” Sekretáriu Jerál CVTL, Luis Pedro, hateten ba Agência Tatoli, iha nia servisu fatin Bairro dos Grilhos, kuarta ne’e.
CVTL hanesan organizasaun ida-ne’ebé sei iha kompromisu atu fó apoiu ba ema seluk liuhosi asisténsia voluntáriu, tanba membru CVTL voluntáriu sempre disponível atu fornese asisténsia iha responde emerjénsia durante situasaun importante sira-ne’ebé akontese iha nível nasionál no internasionál.
“CVTL ajuda ema vulneravel sira-ne’ebé iha nesesidade hanesan fornese asisténsia umanitária emerjénsia, doasaun raan, bee no saneamentu no iha kompromisu atu apoia vítima dezastre naturál, asidente tránzitu, situasaun COVID-19, bee-sae no moras dengue,” nia dehan.
Asaun asaun voluntáriu ne’e ba iha komunidade liu-liu iha área rurál no voluntáriu ne’e la fó diferensia entre ema tanba CVTL sempre mai ho ema-nia sentimentu atu ajuda malu no promove diversidade tanba konsidera ema hotu hanesan.
Durante ne’e, CVTL nia parseiru nasionál no internasionál ne’ebé apoiu hosi nasaun Austrália, Nova Zelándia, Amérika, Singapura, Thailándia, Indonézia no sira seluk.
Ida ne’e, inklui parseiru prinsipál Governu Timor-Leste liuhosi sosiedade sívil iha Gabinete Primeiru-Ministru nia mahon sempre fó osan hamutuk $250,000.
“Apoiu finanseiru no kapasitasaun ida-ne’e atu hadi’a funsionáriu CVTL sira-nia implementasaun programa iha terrenu,” nia dehan.
Voluntáriu hamutuk 1.300 no funsionáriu CVTL nian hamutuk 140 mak servisu ativamente hodi fornese asisténsia umanitária.
Jornalista : Osória Marques
Editór : Cancio Ximenes
