DILI, 31 agostu 2022 (TATOLI)–Empreza Global Industries Group hosi Brisbane, Austrália planeia loke indústria iha Timor-Leste hodi emprega timor-oan 27.000.
Prezidente empreza Global Industries Group, Michael Francis, ho nia ekipa, kuarta ne’e hasoru malu ho Primeiru-Ministru (PM), Taur Matan Ruak, hodi informa planu investimentu.
“Ami ko’alia ho Primeiru-Ministru katak ami atu mai investe iha Timor-Leste, Governu autoriza atu empreza bele halo operasaun iha kualker tempu de’it, ne’ebé ami sei mobiliza uluk ekipamentu molok realiza. Ami presiza tempu fulan-tolu hodi mobiliza ekipamentu sira hosi rai-li’ur mai, iha inísiu sei fó serbisu ba joven timor-oan 27.000 no bele to’o 29.000,” Prezidente empreza Global Industries Group, relata hafoin hasoru Xefe Governu iha Rezidénsia PM iha Farol.
Notísia relevante: SERVE simu pedidu empreza nasionál ualu reativa hikas atividade ekonómika
Biban ne’e, nia sente kontente tanba Primeiru-Ministru bele disponibiliza hasoru tanba durante ne’e tenta atu hasoru maibé la konsege.
“Sorte boot tebes ami bele hasoru Primeiru-Ministru, tanba ami tenta tinan hirak ona atu hasoru nia hodi informa investimentu ne’e, ne’ebé Primeiru-Ministru husu katak lais liu di’ak liután no fó garantia katak Governu Timor-Leste apoia ami-nia investimentu,” nia akresenta.
Jerente empreza ne’e dehan, hakarak halo investimentu ho objetivu atu fó serbisu ba joven sira tanba sira akompaña informasaun hosi mídia katak joven barak mak seidauk iha serbisu.
“Ami sente preokupadu, ami presiza ema atu serbisu iha ami-nia empreza,” nia tenik.
Investimentu ne’e iha área agrikultura hanesan kuda mikrofonik, hakiak manu DOC, inklui loke indústria prodús roupa no indústria serveja.
“Indústria serveja la’ós atu hatún fali Heineken, maibé pelu menus iha tan indústria ida atu nune’e konsumidór sira hili tuir sira-nia gostu, tanba daudaun ne’e produtu barak mai hosi rai-li’ur. Entaun ho loke indústria ne’e bele fó serbisu mós ba joven rai-laran tanba produtu sira ne’e sei prodús iha rai-laran, balun fa’an iha rai-laran no balun exporta ba rai-li’ur. Aleinde ne’e loke fábrika ba ró peska no ró seguransa,” nia salienta.
Jornalista : Antónia Gusmão
Editora : Julia Chatarina
