iklan

JUSTISA, HEADLINE

Fila hosi Jakarta, PCIC asegura traballadora na’in-hitu iha uma mahon

Fila hosi Jakarta, PCIC asegura traballadora na’in-hitu iha uma mahon

Toba-fatin traballadór timoroan sira iha Dubai. Imajen/Traballadór timoroan iha Dubai

DILI, 31 agostu 2022 (TATOLI)Polísia Siéntifiku no Investigasaun Kriminál (PCIC,sigla Portugés), kontinua asegura traballadora na’in-hitu iha uma mahon, tanba sai vitima ba ajénsia balun hodi haruka sira ba serbisu iha Dubai,  Uni Emiradu Árabe (UEA).

“Sira nain hitu (7) ne’e ita konsidera hanesan vítima, nune’e ita labele fó sai nia identidade ita labele fó sai sira nia paradeiru. Maibé daudaun ne’e sira na’in-hitu  iha ona iha Timor-Leste no ita kontinua asegura iha uma-mahon,” Portavós PCIC, Octavio da Costa Araújo, informa ba jornalista sira iha edifisiu PCIC-Colmera, kuarta ne’e.

Notísia relevante:  Traballadora timoroan na’in-hitu iha Jakarta fila hikas mai TL

PCIC iha obrigasaun atu asegura no halo identifikasaun traballadór na’in-hitu ne’e, hafoin repatria hosi Dubai mai to’o iha Jakarta no 26 agostu 2022 fila hikas mai iha Timor-Leste liu hosi via Terrestre, Kupang mai Motain.

Prosesu repatrisaun hosi Dubai bá Jakarta no mai to’o Timor-Leste ne’e ne’e responsavél Governu Timor-Leste liuhosi esforsu Ministériu Negosiu Estranjeiru no Kooperaaun (MNEK), ne’ebé koordena ho Embaixada Timor-Leste iha rai li’ur.

Iha prosesu identifikasaun, nia dehan traballadór na’in-hitu ne’e deklara husu ba kompañia ka ajénsia ne’ebé halo rekrutamentu ba sira atu devolve sira nia osan ne’ebé uza ba sosa billete.

Nia dehan ho rezultadu identifikasaun ne’e PCIC sei loke fali investigasun foun ba arguidu na’in-tolu ne’ebé antes ne’e Tribunál Distritál Dili (TDD) aplika ona medida koasaun Termu Identidade Rezidénsia (TIR).

“Ita kontinua loke prosesu investigasaun ne’ebé antes ne’e iha ona, bainhira Ministériu Públiku delega kompeténsia bá iha PCIC hodi kontinua prosesu inkéritu. Tanba iha prosesu investigasaun mak iha tan intervenente foun ida ka iha tan ema foun ruma ne’ebé iha indísiu envolve ba iha krime sira ne’e, automatikamente ita sei notifika hotu sira atu halo prosesu,” katak Portavós ne’e.

Traballadora na’in-hitu ne’e antes ne’e ajénsia rekruta sira atu ba serbisu, maibé bainhira to’o iha fatin destinasaun, traballadór hirak la halo serbisu tuir kontratu.

Antes ne’e, trabaladór nain hitu (7) ne’e husi Abudabi Uni Emiradu Árabe hela iha Embaixada Timor-Leste iha Jakarta. Durante sira nia estadia iha Jakarta Indonézia, sira nia nesesidade tomak responsavél husi parte Embaixada Timor-Leste iha Jakarta.

Notísia relevante:  Timoroan na’in-hitu “terus” hela iha Dubai

Jornalista: Natalino Costa

Editór       : Florencio Miranda Ximenes

iklan
iklan

Leave a Reply

iklan
error: Content is protected !!