Governu seidauk hadi’a sede suku Holpilat anin sobu iha 2017
COVALIMA, 31 agostu 2022 (TATOLI) –Dezastre natural ne’ebé akontese iha loron 02 fulan-fevereiru tinan 2017 ne’ebé rezulta anin sobu zinku sede suku Holpilat, postu Adminisrativu Maucatar, Munisípiu Covalima, to’o ohin loron Governu liuhosi Ministériu Administrasaun Estatál (MAE) seidauk hadi’a.
“Ita-nia sede suku nia kondisaun ne’ebé aat tanba hetan estragu hosi dezastre naturál ne’ebé anin sobu kalen sede suku holpilat iha 02 fevereiru 2017 ne’e to’o agora seidauk hadi’a. Maske ha’u haruka ona proposta ba Ministériu Administrasaun Estaáal (MAE) maibé to’o ohin loron seidauk iha rezultadu,” Xefe suku Holpilat, Emilio do Carmo Gusmão, hateten ba Agência Tatoli, iha nia knaar fatin suku Holpilat, kuarta ne’e.
Maske kondisaun sede suku ne’ebé anin sobu zinku no husik kakuluk balun husik nakloke luan, maibé xefe suku ho nia konsellu suku sira kontinua hala’o sira-nia kna’ar iha sede nia okos hodi halo atendimentu ba komunidade iha suku Holpilat.
“Sede suku Holpilat anin sobu no halo zinku loke naksobu iha tinan 2017 maibé ha’u-nia konsellu suku sira ami mantein halo atendimentu ba komunidade sira iha sede refere, maske anin sobu ziku ne’ebé to’o ohin loron seidauk hadi’a,” nia dehan.
Hafoin anin siku zinku sede suku Holpilat nian ne’e, xefe suku hato’o kedas karda pedidu ba iha nasionál no ba iha administrasaun munisípiu Covalima maibé to’o ohin loron seidauk iha rezultadu.
Populasaun iha suku holpilat, postu administrativu Maucatar, Munisípiu Covalima hamutuk na’in-2700-resin ne’ebé iha aldeia Hatu, Nainare, Manulór, Leogore no Fatuk Oan.
Jornalista : Celestina Teles
Editór : Cancio Ximenes
