DILI, 31 agostu 2022 (TATOLI)—Asesór Finansa Ministériu Asuntu Parlamentár no Komunikasaun Sosiál (MAPKOMS), Jorge Gama, informa prosesu estabelesimentu konstrusaun edifísiu própriu ba Agénsia TATOLI, Instituisun Públiku (TATOLI, I.P) no Rádio e Televisão Timor-Leste, Empreza Públiku (RTTL, E.P) iha faze estudu viabilidade.
Notísia Relevante: Konstrusaun edifísiu TATOLI, I.P-RTTL, E.P tama ona prosesu loke konkursu públiku
Edifísiu ba TATOLI, I.P no RTTL, E.P atu halo foun ne’e nia faze foin mak estudu viabilidade. Iha faze estudu viabilidade ne’e, agora daudaun iha ona CNA sei halo konkursu ba kompañia ne’ebé manán atu halo estudu viabilidade ba edifísiu TATOLI, I.P no RTTL, entaun, iha semana kotuk ha’u ba duni CNA sira atu finaliza ona iha semana ne’e nia laran bele fó ona rezultadu ba kompañiaa ne’ebé atu sai vensedór ba estudu viabilidade ne’e,” Jorge Gama hateten ba Agência Tatoli, via telefónika, kuarta ne’e.
Nia esplika, estabelesimentu edifísiu TATOLI, I.P no RTTL, E.P, nia finansiamentu mai hosi grande projetu CAFI.
“KAFI mak halo, la’ós hosi liña ministeriál no ita la tau orsamentu. Agora daudaun estudu viabilidade ita kontinuasaun uluk ne’e nia orsamentu CAFI prepara purvolta $212.000, ne’e ba estudu viabilidade. Tanba estudu viabilidade ne’e faze ida, la’ós ba halo konstrusaun. Orsida estudu viabilidade kompleta hotu mak ita foin halo tan konkursu ba Detail Engineering Design (DED), hosi ne’e mak ita foin hatene orsamentu ba konstrusaun no nia modelu ba uma,” nia dehan.
Iha OJE 2020 ne’e, nia dehan, Governu aloka orsamentu millaun $5 ba konstrusaun edifísiu TATOLI, I.P no RTTL, E.P, maibé tanba seidauk halo estudu viabilidade no seidauk halo Detail Engineering Design (DED) nusa orsamentu ba konstrusaun iha ona.
Tanba, bazea ba estudu rua ne’e hotu mak foin hatene totál orsamentu, tanba ne’e iha faze estudu viabilidade ne’e seidauk hatene loloos estimasaun orsamentu, maibé nia orsamentu uluk komesa hosi 2019 no anteriór sira aprezenta iha $212.000 ne’ebé CAFI prepara.
Maske nune’e, iha prosesu estudu viabilidade ne’e foin daudaun CAFI mak tau orsamentu $170 mill la’ós liña ministeriál mak tau.
Notísia Relevante: MAPKOMS loke hikas konkursu ba konstrusaun edifísiu TATOLI, I.P no RTTL, E.P
Jornalista : Nelia Fernandes
Editór : Cancio Ximenes
