Konstrusaun Jardín Chama Eterna tama ona iha faze finalizasaun
DILI, 31 agostu 2022 (TATOLI)—Diretór Ezekutivu Arkivu no Muzeu Rezisténsia Timorense (AMRT), Hamar Antóninho Bapstista Alves, informa prosesu konstrusaun ba jardín “Chama Eterna” tama ona iha faze finalizasaun.
Notísia Relevante: Autoridade hahú prepara aprovizionamentu kontratu konstrusaun ‘Jardim da Chama Eterna’
“Prosesu jardín Chama Eterna tama ona iha nia finalizasaun. Agora ami sei haree prosesu administrativa, nia administrativamente ami sei iha hela liña koordenasaun ho legál sira, prinsipálmente ba Ministériu ne’ebé AMTR tutela atu haree ba aprovasaun asina akordu ho konstrutór hahú halo servisu. Nia prosesu aprovizionamentu hotu ona no hetan ona aproximasaun hosi CAFI no iha onaezbosu preleminár atu hahú asina akordu kontratu. Tanba ne’e, nia prosesu administrativa mak ami sei haree hela iha semana ne’e nia laran, prosesu administrativa ne’e finál, nune’e ita sei ko’alia halo konferensia imprensa ba prosesu asinatura kontratu ho impreza sira,” Hamar Antóninho Bapstista Alves hateten ba Agência Tatoli, iha nia kna’ar fatin, Díli, kuarta ne’e.
Orsamentu ba konstrusaun jardín “Chama Eterna “ ne’e Konsellu Ministru (KM) aprova ona provolta milliaun $5 no iha prosesu aprovizionamentu sira halo apresiasaun ba empreza sira ne’ebé hatama nia proposta kuotasaun ba manán na’in provota millaun $4 resin.
“Ida ne’e ami sei haree, tanba ida ne’e apresiasaun hosi CNA (Komisaun Nasionál Aprovizionamentu) ho CAFI. Hosi ne’e ha’u marka ona audiénsia ho Primeiru-Ministru no iha ona resposta mai atu haree nia prosesu sira hotu nia kopia no exemplar sira atu prepara hodi ba ko’alia ho Primeiru-Ministru, antes ne’e halo asina kontratu. Tanba ne’e, ami sei haree hela prosesu kiik-oan balun ne’ebé presiza atu haree hamutuk,” nia dehan.
Kona-ba empreza ne’ebé sei halo konstrusaun ba jardín “Chama Eterna”, nia parte seidauk fó resposta tanba seidauk asina kontratu ho empreza.
Notísia Relevante: AMRT Aprezenta Ona Modelu “Jardim da Chama Eterna” Ba Altu Entidade
Jornalista : Nelia Fernandes
Editór : Cancio Ximenes
