DILI, 31 agostu 2022 (TATOLI)-Amu Papa Fransisco selebra misa agradesimentu ba kardeál na’in-21, inklui Kardeál foun Timor-Leste, Don Virgílio do Carmo da Silva, SDB, iha Igreja Basilika São Pedro Vaticano Roma, 30 agostu 2022.
Notísia Relevante: Kardeál Virgílio: “Ksolok ne’e la’ós ba ha’u maibé ba igreja no povu TL”
Misa ne’e hala’o hafoin kardeál sira simu konsultóriu ordináriu públiku iha 27 agostu no misa ne’e partisipa direta hosi sarani rihun resin, inklui sarani Timor-Leste hamutuk ho Enviadu Espesiál Extraordináriu Prezidente Repúblika, Kay Rala Xanana Gusmão ho nia ekipa.
Ba Kardeál na’in-20 ne’ebé hola parte ona iha Koléjiu Kardinalísiu, Papa Francisco husu atu halo igreja sai atraiante.
“Liafuan maromak hamosu ita-nia administrasaun iha igreja, sai igreja, no ida-ne’e mak sai atraiante ba komunidade fiar-na’in sira, dahuluk ba an rasik no depois ba ema hotu. Dupla mistériu ne’e hetan bensaun hosi kristu no ba kristu iha mundu. Admirasaun ida-ne’e la hamenus hosi ita tinan ba tinan, nein menus mós iha responsabilidade ba igreja grasa Maromak nian hametin halo sai kle’an. Ha’u fiar katak hanesan ne’e mós ba imi, maun-alin sira -e’ebé hola parte iha Koléjiu Kardinalísiu,” Amu Papa Francisco hateten iha nia ómilia liuhosi komunikadu imprensa ne’ebé Agência TATOLI asesu hosi mídia Palásiu Prezidesiál Nicolau Lobato, kuarta ne’e.
Papa husu ba kardeál sira kontinua servisu makaas hodi sai nu’udar ilas Nai Jesus no santu sira hotu no hadomi igreja no sarani nu’udar Nai Kristu nia maksoin hodi lori dame ba ema hotu iha moris.
Tuir ajenda, kuarta 31 agostu, Enviadu Espesiál Extraordináriu Prezidente Repúlika, Kay Rala Xanana Gusmão no Kardeál Don Virgílio do Carmo da Silva hamutuk ho Embaixadora Timor-Leste ba Vátikanu, Juvita Rodrigues B. Ataide Gonçalves no komunidade Timoroan sira iha Roma sei selebra misa agradesimentu ba kaerdeál foun.
Hafoin misa, Kardeál Don Virgílio no Xanana Gusmão sei hato’o nia mensajen ba Timoroan sira iha Vátikanu.
Jornalista : Nelson de Sousa
Editór : Cancio Ximenes
