iklan

HEADLINE, SEGURANSA

Deskonfia suspeitu ida tara-aan iha sela detensaun Komandu PNTL Dili

Deskonfia suspeitu ida tara-aan iha sela detensaun Komandu PNTL Dili

Ekipa Polísia FORENSIK transporta ona mate-isin JB ba HNGV atu hala’o prosesu autópsia. Imajen/Natalino Costa.

DILI, 01 setembru 2022 (TATOLI)- Deskonfia suspeitu ida ho inisiál JB, tara-aan ho fiu eletrisidade iha sela detensaun Polísia Nasionál Timor-Leste (PNTL), Komandu Munisípiu Dili.

Joven ho inisiál JB, antes ne’e nu’udar suspeitu tanba deskonfia envolve iha kazu konfrontu ka halo agresaun fíziku iha festa graduasaun ida iha área Audian.

Nune’e, PNTL Dili detein suspeitu iha sela detensaun, iha loron kuarta (31/08), kalan, atu kumpre oras 72, molok submete ba interrogatóriu dahuluk iha Tribunal Distritál Dili (TDD).

Deskonfia joven ida ho insiál JB tara-aan iha sela detensaun Komandu PNTL Dili. Imajen/Natalino Costa.

Maibé, iha loron kinta (01/09), tuku 19:00, suspeitu JB mate iha sela detensaun komandu PNTL Dili tanba deskonfia tara-aan.

Hafoin akontesimentu ba kazu deskonfia tara-aan ne’e,  Komandu PNTL Dili komunika kedan parte família matebian no Ministériu Públiku no Polísia Investigasaun Kriminál Nasionál (PNSIK), ekipa FORENSIK Komandu Jerál PNTL to’o kedan iha fatin akontesimentu hodi sai sasin ba suspeitu JB ne’ebé tara-aan iha sela detensaun ne’e.

Tuir observasaun Agência TATOLI iha tereñu nota katak, Komandante Polísia Nasionál Servisu Investigasaun Kriminál (PNSIK), Superintendente Xefe, Jorge Monteiro, to’o kedan iha fatin akontesementu hodi hala’o enkontru ho parte Ministériu Públiku, reprezentante família no Sekretáriu Jerál PSHT, Pedro Aparicio hodi atualiza profundamente kona-ba JB nian-mate iha sela detensaun Komandu Dili.

“Ha’u seidauk simu relatóriu kona-ba kazu ida ne’e, nune’e ha’u hein relatóriu hosi Komandu Munisípiu Dili. Ita boot sira bele husu informasaun kle’an kona-ba kazu ne’e iha Komandu Munisípiu Dili,” Komandante Polísia Nasionál Servisu Investigasaun Kriminál (PNSIK), Superintendente Xefe, Jorge Monteiro hateten ba Agência TATOLI.

Atu hatene motivu ba kazu deskonfia tara-aan ne’e, Jornalista Agência TATOLI tenta konfirma ba Komandante Polísia Nasionál Timor-Leste (PNTL), Munisípiu Dili, Superintendente Xefe Henrique da Costa, liuhosi via telefónika, maibé la atende.   Enkuantu tenta mós konfirma ho parte família maibé rejeita fó komentáriu.

Maske, parte família no kolega matebian la simu no rejeita JB nia-mate ne’e tanba deskonfia tara-aan, maibé Sekretáriu Jerál Organizasaun Arte Marsiál Persaudaraan Setia Hati Terate (PSHT), Pedro Aparicio ho Ekipa PNSIK konsege hakalma situasaun hodi transporta mate-isin bá HNGV atu halo prosesu autópsia.

Jornalista: Natalino Costa

Editór      : Florencio Miranda Ximenes

iklan
iklan

Leave a Reply

iklan
error: Content is protected !!