DILI, 01 setembru 2022 (TATOLI)—Primeiru-Ministru (PM), Taur Matan Ruak, hateten iha enkontru semanál ho Prezidente Repúblika, José Ramos Horta, ne’e ko’alia kona-ba asuntu dezenvolvimentu Greater Sunrise, nune’e iha vizita Estadu nian ba Austrália ne’e PR sei levanta mós asuntu refere.
“Naturalmente ida-ne’e kuaze vizita hotu-hotu tantu ita ba halo iha Austrália no kuantu Austrália mai iha ne’e tópiku boot ida baibain ita levanta, entaun konserteza Prezidente Repúblika sei ba levanta asuntu ne’e ho Austrália, hanesan mós ha’u rasik levanta horisehik iha enkontru ho Ministra Negósiu Estranjeiru Austrália nian,” Primeiru-Minbstru ne’e hateten ba jornalista sira hafoin ramata enkontru semenál ho Xefe Estadu iha Palásiu Prezidensiál Nicolau Lobato, Bairru Pite, kinta ne’e.
Xefe Governu hateten, sira-nia kompromisu mak buka dalan hotu hodi haree hetan solusaun ba prosesu Greater Sunrise ne’e.
Antes ne’e iha loron 01 agostu, Ministru Petróleu no Minerál (MPM), Victór da Conceição Soares akompañadu hosi Prezidente Timor GAP, Empreza Públika no Prezidente Autoridade Nasionál Petróleu no Minerál (ANPM), hala’o audiénsia ho Prezidente Repúblika, José Ramos Horta, hodi atualiza kona-ba progresu dezenvolvimentu Greater Sunrise.
Prosesu sira durante ne’e la’o hanesan realiza diskusaun entre Governu Timor-Leste ho Governu Austrália kona-ba dokumentu PSC, fiskál rejime ho dokumentu lubuk ida seluk, tan ne’e agora daudaun la’o hela no mós kalendáriu dokumentu sira-ne’e atu konklui iha fulan novembru tinan 2022.
Pozisaun Timor-Leste nian klaru kona-ba atu dada kadoras mai Timor-Leste, maibé la’ós ho razaun polítika de’it maibé ne’e iha razaun viabilidade tékniku, komersiál ho ekonómiku.
Nune’e, informasaun sira hosi ANPM no Timor Gap fundamenta ona katak estudu viabilidade permite kadoras dada mai Timor-Leste, entaun bainhira termina diskusaun iha fulan novembru mak sei asina akordu ka aprova dokumentu ne’ebé halo diskusaun ne’e faze ida, hafoin ne’e tama ba faze seluk bolu dezenvolvimentu kampu.
Tan ne’e, Governu daudaun ne’e iha seriedade atu bele rezolve problema Greater Sunrise durante tempu naruk no hakarak duni ho situasaun rai-laran, TL nia kampu Bayu Undan mós termina ona nune’e tenke fó atensaun prioridade atu aselera kampu Greater Sunrie.
PM dehan, kona-ba vizita Ministra Negósiu Estranjeiru Austrália nian mai Timor-Leste oinsá atu reforsa kooperasaun di’ak liután entre nasaun rua.
“Vizita no konversa sira di’ak loos, tantu vizita ne’e objetivu atu reforsa ita-nia kooperasaun no mós haree dalan halo nusa aban bainrua kooperasaun sira mai sei haree iha tempu oin mai. Tanba ita bo’ot sira hateten relasaun diplomátika ho Austrália ita kompleta tinan ida-ne’e halo tinan 20,” nia hateten.
Durante enkontru semanál, Xefe Governu ho PR ko’alia uitoan kona-ba atividade sira no mós vizita Ministra Negósiu Estranjeiru Austrália nian no vizita PR nian ba Austrália no mós preparativu ba simu ita-nia Eminénsia Kardeál Dom Vrigílio do Carmo da Silva, SDB.
Enkuantu, tuir ajenda Xefe Estadu nia vizita sei hasoru malu hodi halo enkontru ho Primeiru-Ministru Austrália, Anthony Albanese, hafoin kontinua hasoru malu ho Ministu Negósiu Estranjeiru inklui sei hala’o atividade lubun iha Canberra.
Nune’e mós, iha Sidney, sei halo mós vizita ba universidade balun hafoin liu kedan ba Darwin loron ida no sei fila mai Timor-Leste iha loron 12 setembru.
Notísia Relevante: PN aprova pedidu PR Horta vizita Austrália no EUA
Jornalista : Nelson de Sousa
Editór : Cancio Ximenes
