iklan

NASIONÁL, KAPITÁL

AMD sei kontrata pesoál seguransa tau matan ba jardin kapitál Dili

AMD sei kontrata pesoál seguransa tau matan ba jardin kapitál Dili

Iluminasaun iha jardin 5 de Maiu Kolmera la funsiona ho di’ak. Imajen Tatoli/Francisco Sony.

DILI, 02 setembru 2022 (TATOLI)—Adjuntu Prezidente Autoridade Munisípiu Dili (AMD), António Moniz Clau, informa iha tempu badak Autoridade Munisípiu Dili (AMD) sei kontrata pesoál seguransa hodi tau matan ba jardin iha kapitál Dili.

Notísia Relevante: 2022: AMD sei rekruta pesoál hamoos no seguransa jardin 200-resin

“Jardin sira ita sei koloka ita-nia ema seguransa, maibé daudaun ne’e prepara hela kontratu tanba iha jardin Cristo Rei pesoál seguransa na’in-12, Prezidente BJ-Habiebie na’in-haat (4), Largo Lecidere na’in-neen (6), jardin 05 Maio Colmera na’in-neen (6), jardin 12 Novembro Motaél ns’in-neen (6) no jardin Bebora área GMN nia oin nain-neen (6). Ida-ne’e, daudaun ne’e ita prepara hela sira-nia kontratu, hodi sira hahú iha setembru nia laran,” Adjuntu Prezidente Autoridade Munisípiu Dili (AMD), António Moniz Clau, informa ba Ajénsia Tatoli iha nia kna’ar fatin, Dili, sesta ne’e.

Seguransa iha jardin kapitál Dili uluk ne’e, Autoridade Munisípiu Dili (AMD) kontrata kompañia PAX mak toma konta seguransa.

“Tanba, sira mak uluk halo konta tau seguransa ba ita-nia jardin sira maibé agora iha tinan ne’e loloos ita kontrata tiha iha fulan rua ba kotuk, maibé prosesu ne’e la’o entaun ita foin hahú atu kontrata ida-ne’e. Maibé, iha jardin balun mak ita hatun ona pesóal balun ba serbisu iha ne’ebá, maibé sira seidauk asina kontratu,” nia dehan.

Maske nune’e, ba kontrata pesoál seguransa ne’e iha fulan ida kada pesoál sei simu orsamentu hamutuk $115.

“Orsamentu ba ita-nia kontratu ne’e kada pesoál seguransa sei simu orsamentu $115, hodi halo servisu hanesan seguransa iha jardin sira,” nia dehan.

Jornalista : Nelia Fernandes

Editór      : Cancio Ximenes

iklan
iklan

Leave a Reply

iklan
error: Content is protected !!