DILI, 02 setembru 2022 (TATOLI)—Ekipa konjunta kompostu hosi Polísia Nasionál Investigasaun Kriminál (PNSIK), Ministériu Públiku, Provedória Direitu Umanu no Justisa (PDHJ), Defensoria Públika (DP), no reprezentante família matebian, sesta ne’e (02/08), hahú serbisu hodi rekolla evidénsia-sira no halo investigasaun ba kazu joven ho inisiál JB, ne’ebé mate ho kondisaun fiu eletrisidade iha kakorok, iha sela detensaun Komandu Munisípiu Dili.
“Komandu Jerál PNTL hasai orden urjénsia ida hodi nomeia ekipa konjunta hodi halo investigasaun ba kazu ne’ebé maka ita hotu la espera akontese iha sela detensaun Komandu PNTL Dili. Nune’e, sesta ohin, (02/08), lokoraik ne’e, ekipa hahú nian serbisu hodi rekolla evidénsia sira no halo investigasaun kle’an ba kazu tara-aan ne’e to’o iha nian prosesu finalidade. Bainhira ekipa ne’e finaliza nian investigasaun Komandu PNTL sei hato’o ba públiku,” Portavós Komandu Jerál Polísia Nasionál Timor-Leste (PNTL), Superintendente Xefe Armando Monteiro, hateten liuhosi Konférensia Imprensa iha Kuartél Jerál PNTL-Caicoli, sesta ne’e.
Notísia relevante: Komandu PNTL hahú forma ekipa investiga kazu tara-aan iha sela detensaun
Komandu Jerál PNTL fó tempu loron tolu (durante oras 72), hahú sesta (02/09) to’o domingu (4/09) ba ekipa konjunta atu finaliza prosesu investigasaun no entrega rezultadu ba komandu jerál atu prosesa hodi informa ba públiku.
Tanba ne’e, portavós ne’e dehan Komandu Jerál PNTL seidauk pronúnsia kona-ba motivu loloos ba kazu sidadaun JB nian-mate tanba prosesu hotu sei iha faze investigasaun.
“Ha’u seidauk bele temi buat ruma, enkuantu ekipa ida seidauk bele finaliza sira nian serbisu, ita hein ekipa konjunta ne’e mak sei halo investigasaun no halo ezaminasaun ba prosesu tomak,” nia afirma.
Suspeitu ida ho inisiál JB, mate ho fiu eletrisidade iha kakorok, iha sela detensaun Kaikoli, Polísia Nasionál Timor-Leste (PNTL), Komandu Munisípiu Dili.
Joven ho inisiál JB, antes ne’e nu’udar suspeitu ba kazu konfrontu ka halo agresaun fíziku iha festa graduasaun ida iha área Audian.
Nune’e, PNTL Dili detein suspeitu iha sela detensaun, iha loron kuarta (31/08), kalan, atu kumpre oras 72, molok submete ba interrogatóriu dahuluk iha Tribunal Distritál Dili (TDD).
Maibé, iha loron kinta (01/09), tuku 19:00, suspeitu JB mate iha sela detensaun komandu PNTL Dili, ho kondisaun fiu eletrisidade iha kakorok.
“Atu hatene nia halo aktu suísidu ka la’e ne’e mak hanesan sidadaun timor-oan hanesan mós seguransa ba povu no rai ida ne’e, husu nafatin ita hotu nia komprensaun no kolaborasaun ba ita nian ekipa konjunta investigasaun bele halo sira nia kna’ar ho di’ak to’o kazu ne’e hetan nia konkluzaun finál,” portavós ne’e sujere.
PCIC rekolla kamara CCTV
Entretantu, Polisia Siéntifika Investigasaun Kriminál (PCIC, sigla portugés), ne’ebé lidera direta hosi Xefe Investigadór, Dedi da Silva, hahú rekolla evidénsia balun hanesan kamara Closed Circuit Television (CCTV) iha sela Kaikoli, Komandu Munisipiu Dili.
PCIC rekolla evidénsia hanesan iha tuku 14:00 to’o tuku 15:30, lokoraik ne’e, atu asegura no bele sustenta informasaun balun ba ekipa konjunta.
Maske PCIC foti gravasaun CCTV ne’e, maibé iha informasaun balun ne’ebé Agência TATOLI asesu iha tereñu katak, CCTV sira ne’ebé mak antes monta iha edifísiu komandu PNTL Dili inklui iha sela detensaun Komandu Dili avaria kle’ur ona no laiha osan atu halo manutensaun.
HNGV finaliza ona autópsia
Xefe Departamentu Forensik Hospitál Nasionál Guido Valadares (HNGV), Nilton Tilman, informa ekipa forensik hahú finaliza ona prosesu autópsia ba mate-isin JB no daudaun elabora hela rezultadu atu entrega ba ekipa konjuta.
“Ami finaliza ona autópsia no entrega mate-isin ba família atu halo seremonia funebre,” Xefe Departamentu ne’e informa.
Nia dehan rezultadu autópsia ne’e hanesan xave atu hatene loos motivu ba kazu ne’e, nune’e tempu besik sei entrega ba ekipa konjunta hodi fasilita prosesu investigasaun.
Iha fatin hanesan, Maun hosi matebian, Estavão António de Jesus, hateten aseita tebes halo autópsia hodi hatene loloos motivu hosi nia alin mate ne’e.
“Kazu ne’e ami levanta ba oin tanba ha’u nia alin ne’e mate iha sela detensaun, nune’e ami hakarak autópsia para hatene motivu loloos,” nia afirma.
Notísia relevante: Deskonfia suspeitu ida tara-aan iha sela detensaun Komandu PNTL Dili
Jornalista : Natalino Costa/Felicidade Ximenes
Editór : Florencio Miranda Ximenes
