BAUCAU, 02 setembru 2022 (TATOLI) – Governu liuhosi Ministériu ba Asuntu Parlamentár no Komunikasaun Sosiál (MapKoms) sesta ne’e, realiza diálogu komunitária iha suku Saelari, postu administrativu Laga, munisípiu Baucau.
Ministru ba Asuntu Parlamentár no Komunikasaun Sosiál, Francisco Martins Pereira Jerónimo, hateten, governu konsidera povu mak sai alvu ba dezenvolvimentu tanba ne’e presiza hakbesik liuhosi dalan komunikasaun hanesan diálogu komunitária nune’e hato’o programa ne’ebé governu halo ona no transmite ba povu atu komprende.
“Ami mai atu ajuda ita-boot sira hodi hadi’a rai ida-ne’e sai diak liután tuir programa VIII governu konstitusionál lideradu jenerál Taur Matan Ruak,” MapKoms hateten iha sede suku Saelari, sesta ne’e.
Objetivu hosi diálogu komunitária ne’e intrudúz polítika no programa prioridade sira no mós atinjementu ka progresu serbisu hosi VIII governu konstitusionál ba komunidade iha baze, lori governu ba iha komunidade nia leet hodi rona preokupasaun, difikuldade no problema ne’ebé hasoru iha baze.
Nune’e mós promove asesu ba informasaun iha área rurál no hakbiit komunidade sira-nia kapasidade asesu ba informasaun no hasa’e koñesimentu kona-ba dalan progresu planu, implementasaun dezenvolvimentu iha baze inklui partisipasaun povu nian.
Xefi suku Saelari, Mateus Cardoso espresa sentimentu kontenti tanba liuhosi diálogu entre membru governu ho komuinidade sai momentu oportunidade atu hato’o ba malu kona-ba preokupasaun povu iha baze, liuliu postu Laga espesialmente iha suku Saelari.
“Problema ne’e barak hanesan estrada tanba kondisaun ba aldeia sei aat, bee-moos sei falta inklui komunidade balun seidauk asesu ba eletrisidade,” Mateus Cardoso akresenta.
Suku Saelari kompostu aldeia sia hanesan Bubuloma, Lalilaidama, Larisura, Laritau, Lauhare, Riadae, Saelari, Samalanu no Terubala ho totál populasaun 2.770 ho xefe família 612.
Partisipa iha diálogu komunitária ne’e kompostu hosi MapKoms, Francisco Jerónimo, Ministru Asuntu Kombatente Libertasaun Nasionál, Júlio Sarmento ‘Meta Malik’, Ministru Edukasaun Juventude no Desportu (MEJD), Armindo Maia, Vise Ministru Administrasaun Estatal (MAE), Lino de Jesus Torrezão, Deputadu Cornelio Gama ‘L-7’, autoridade lokál no Komunidade sira.
Jornalista : Natalino Belo
Editór : Evaristo Soares Martins
