VIQUEQUE, 02 setembru 2022 (TATOLI)—Postu saúde Macadique, postu administrativu Uatulari, munisípiu Viqueque, falta rekursu umanu hodi implementa programa saúde na família.
“Programa iha postu saúde ne’e la’o maibé ladún di’ak tanba menus pesoál saúde hodi lori programa saúde na família tama sai uma,” Pesoál saúde postu saúde Macadique, Juleta da Silva, hateten iha postu saúde Macadique, sesta ne’e.
Tuir orientasaun nasionál, bainhira atu implementa programa saúde ne’e envolve mós doutór ida.
“Doutór permanente iha ne’e laiha. Tanba ne’e maka daudaun ne’e implementasaun saúde na familia la’o ladún di’ak,” nia akresenta.
Notísia relevante: Programa saúde na família Uatucarbau la’o di’ak
Aleinde ne’e, nasionál no munisípiu sempre ezije implementa programa saúde ne’e hodi hakbesik ba komunidade hodi buka hatene moras saida de’it maka komunidade sira hasoru.
“Postu saúde Macadique iha doutór maibé toma-konta iha fatin seluk, di’ak ida nia mai ona postu, entaun programa la’o bainhira la mai programa saúde família labele la’o. Doutór na’in ida maka koloka mai iha ne’e maibé nia la permanete iha ne’e. Nune’e nia mai postu maka foin ami realiza programa, se doutór ba tiha fatin seluk entaun programa labele la’o,” nia preokupa.
Daudaun ne’e programa saúde na família iha suku Macadique implementa iha aldeia 21, kompostu hosi aldeia 15 iha vila no aldeia neen iha foho, maibé programa ne’e foin tama aldeia neen.
“Tanba ne’e, ha’u husu bainhira implementa programa saúde na família presiza rekruta mós doutór atu programa ne’e bele la’o di’ak,” nia tenik.
Jornalista : Vitorino Lopes da Costa
Editora : Julia Chatarina
