DILI, 02 setembru 2022 (TATOLI)—Administradór postu administrativu Vera Crúz, Manuel Gusmão, informa Servisu Água no Saneamentu (SAS) sei instala bee-moos ba komunidade iha suku Vila Verde, postu administrativu Vera Crúz, munisipiu Dili.
“Kuaze postu Vera Crúz problema bee laiha maibé iha suku Vila Verde mak iha problema bee uitoan, maibé ami ko’alia ona ho SAS agora atu instala ona bee bomba ida iha mota ibun hodi instala ba Vila Verde tomak, ne’ebé ha’u hanoin iha tempu badak ita fornese ona bee ba komunidade iha Vila Verde,” Manuel Gusmão hateten ba Agência Tatoli iha nia kna’ar fatin, Dili, sesta ne’e.
Tuir nia, iha tempu uluk komunidade suku Vila Verde asesu bee-moos maibé bee ne’e iha problema uitoan entre Ailoklaran ho suku Vila Verde, tanba bee ne’e mai hosi Mota Ulun aldeia Lemorana.
“Maibé, agora tuir planu hosi BTL katak bee ne’ebé mai hosi Maloa ne’e labele mai ona ba Vila Verde tanba nia debit kiik. Tanba ne’e mak iha tinan kotuk ita-nia komunidade Vila Verde sempre halerik bee, liu-liu iha área Matadouru sa’e ba. Entaun, bee ne’ebé mai hosi Maloa sei fornese de’it ba Ailoklaran no suku Vila Verde tomak sei fornese bee ne’ebé komesa atu instala,” nia dehan.
Maske nune’e, ho difikuldade bee moos ne’e iha fulan kotuk komunidade Vila Verde hato’o proposta ba administradór postu administrative Vera Crúz katak komunidade iha rai lolon área Manu Meta rai-hun mai to’o Eskola Sekundáriu 04 Setembru nia kotuk presiza bee-moos.
“Maibé, ita hatene katak bee ida agora mai daudaun nia debit la to’o no sira tenke esforsu sa’e ba leten. Tanba ne’e, ha’u ko’alia ona ho Prezidente BTL atu bee ida ita atu instala bomba ne’e, sei tau tanke boot rezerva rua iha foho leten, ne’ebé daudaun ne’e sira tau ona profile haat (4) iha Manu Meta rai-hun, nune’e hosi SAS fornese bee-moos semana ida dala rua no tolu ba ita-nia komunidade hodi hein prosesu instalasaun bee-moos,” nia dehan.
Jornalista : Nelia Fernandes
Editór : Cancio Ximenes
