Ema deskoñesidu taa kanek joven ida iha Uatulari
VIQUEQUE, 03 setembru 2022 (TATOLI)- Ema deskoñesidu taa kanek joven ho naran Adriano Soares (tinan 23), iha aldeia Olusu, suku Matahoi, postu Uatulari, munisípiu Viqueuqe.
Tuir kronolojia ne’ebé konta hosi Xefe Aldeia Iraler, José Soares, katak kazu ne’e akontese iha área eskola Sekundária Iraler- Olusu, iha sesta (02/09), tuku 01:00, madrugada no ema deskoñesidu taa vítima iha parte ulun ho kondisaun saúde grave.
“Horikalan ne’e, ami hala’o diálogu ida iha ami-nia aldeia, maibé ema deskoñesidu taa joven ne’e iha fali parte eskola nian. Depois akontese tiha mak ami foin rona, nune’e ami hamutuk ho Polísia Nasionál Timor Leste (PNTL) tuun bá, haree vitima monu hela iha ne’ebá, maibé autór halai lakon ona,” katak Xefe Aldeia ne’e ba Agência TATOLI liuhosi telefónika, sábadu ne’e.
Ho akontesimentu ne’e, Komandante PNTL Eskuadra Uatulari interinu mak tuun direta ba lokál krime hodi haree vítima nia kanek no telefone kedas ba ambulánsia sentru Uatulari hodi evakua, iha tuku 3:00, madrugada.
“Suspeitu taa vítima ne’e PNTL seidauk identifika, maibé parte PNTL hahú buka tuir suspeitu ka autór ne’ebé taa ita nia joven ne’e,” nia afirma.
Iha sorin seluk, Médiku iha Sentru Saúde Uatulari ne’ebé fó atedimentu saúde ba vítima ne’e, Abito Soares Menezes, hateten vítima hetan taa iha parte ulun ho kondisaun grave.
“Daudaun, ami observa vitíma ninia kanek iha parte ulun ka iha parte matan karuk nia-leten no ami atu suku vítima nia kanek maibé ekipamentu medikamentu limitadu, nune’e ami halo ona transferénsia ba internamentu Viqueque,” nia informa.
Jornalista : Vitorino Lopes da Costa
Editór : Florencio Miranda Ximenes
