iklan

COVALIMA, POLÍTIKA

Enumeradór Covalima hahú prepara foti dadus sensu populasaun 2022

Enumeradór Covalima hahú prepara foti dadus sensu populasaun 2022

Enumeradór na’in-170 iha Munisípiu Covalima preparadu foti dadus sensu populasaun. Imajen/Celestina Teles.

COVALIMA, 03 Setembru 2022 (TATOLI)–Governu liuhosi hosi Diresaun Jerál Estatístika halo ona rekrutamentu ba enumeradór na’in-170, nune’e hahú prepara foti dadus sensu populasaun tinan 2022, iha munisípiu Covalima.

Diretór Estatístika Munisípiu Covalima, Fernando Pereira, hateten faze dahuluk iha rekrutamentu ne’e aplikante na’in-820 mak submete sira-nia dokumentu, hosi númeru ne’e na’in-500 mak hakat  ba iha faze entrevista no na’in 170 mak pasa tuir nesesidade atu kolokadu iha postu administrativu no suku, depende ba área ida-idak.

Formadór fó ona formasaun ba enumeradór supervisór IT atu-bele hafasil  foti dadus populasaun. “Husu ba enumeradór sira foti dadus ho akuradu no halo entrevista, labele si’ik de’it, maibé tenke  kompriende, nune’e  foti dadus ho kualidade, tanba  polítiku na’in sira sei uza dadus ne’e hodi halo dezenvolvimentu iha aldeia, suku no munisípiu”, Diretór Estatístika Munisípiu Covalima, Fernando Pereira, hateten ba TATOLI iha administrasaun Covalima, sábadu ne’e.

Iha biban hanesan, Xefe Departamentu Metodolójia, Eva Fernandes, fó hanoin ba supervisor no enumeradór sira servisu tuir prosesu atubele priénse dadus ho didiak. “Ita-bo’ot sira tenke foti dadus ho di’ak atu kontribui dezenvolvimentu ba ita-nia suku, postu no munisípiu”, nia afirma.

Nune’e mós, Reprezentante Administradór Munisípiu Covalima, Aguntinho Gusmão, reforsa sensu populasaun ne’e importante tebes, nune’e husu enumeradór sira atubele foti dadus populasaun ho di’ak.

“Sensus populasaun tinan 2020, atu hatene populasaun aumenta ka menus, nia moris oinsá. Tanba, ha’u hanoin kualkér dezenvolvimentu presiza dadus, nune’e tenke foti dadus ho loloos, labele inventa no hamenus informasaun”, nia afirma.

Nia husu ba populasaun Covalima atu partisipa ativu ba sensu populasaun hodi fó dadus no responde pergunta sira hosi enumeradór sira. “Tuir lei númeru 14/2022 ita tenke partisipa no sensu populasaun ne’e obrigasaun sívika ne’ebé di’ak ba ita povu no di’ak ba Nasaun”, katak nia.

Notísia relevante:  4 setembru, DGE -MF hahú sensus populasaun no uma kain tinan 2022.

Jornalista: Celestina Teles

Editór       :  Florencio Miranda Ximenes

iklan
iklan

Leave a Reply

iklan
error: Content is protected !!