DILI, 03 setembru 2022 (TATOLI)—Família matebian José Bernardo “Adriano”, rejeita nia-mate tanba tara-aan iha sela detensaun Komandu Polísia Munisípiu Dili, nune’e husu atu fó sai rezultadu autópsia ba família no públiku hodi hatene motivu hosi nia-mate.
“Ami juventude no família matebian José Bernardo “Adriano” sente trsite no laran taridu tanba ami nia alin-mate iha sela detensaun polísia nian. Hafoin mate mak dehan fali mate tanba tara-aan ne’e ami la aseita no konsidera informasaun ne’e laloos. Nune’e ami husu justisa ho loloos ba alin nia-mate. Ami família hein nafatin rezultadu autópsia no husu polísia fó sai atu ami-família no públiku hatene,” dehan família matebian, Ano Carvalho, ba jornalista-sira liuhosi konferénsia imprensa ne’ebé hala’o iha mate-uma Audian-Dili, sábadu ne’e.
Notísia relevante: Ekipa konjunta hahú rekolla evidénsia ba kazu tara-aan iha sela detensaun polísia
Família matebian mós husu ba PNTL Dili atu klarifika no fó sai loloos kona-bá José Bernardo nia-mate katak tara-aan duni ka ema mak oho.
“Sé mate tara-aan duni, ami husu PNTL atu loke kamera CCTV hodi hatudu faktu ho klaru,” katak nian.
Ano Carvalho husu ba ekipa konjunta ne’ebé Komandu Jerál PNTL kria ona atu investiga profunda ba membru PNTL hirak ne’ebé pikete iha loron kinta (01/09) hodi hatene motivu ba kazu ne’e.
“Se karik tuir PNTL sira dehan kamera CCTV avaria ne’e ami juventude Audian deskonfia boot ba membru PNTL balun mak baku mate ami nia alin, hafoin tara fali nia. Ami mós husu ba Parlamentu Nasionál no Governu atu haree ba asaun ne’e,” nia dehan.
Tanba, nia dehan, iha loron kuarta, (31/08), kalan, mosu problema kiik-oan ida iha bairru Audian, tanba ne’e joven sira duni malu no halai tama ba matebian nia uma, nune’e matebian lori joven hirak ne’e sai mai li’ur.
“Maibé to’o iha li’ur ema hirak ne’ebé duni joven sira ne’e baku kedan matebian, hafoin sira husu atu tuku malu ida-idak, maibé ha’u nia alin (matebian) hataan ba sira dehan ha’u lakohi tuku malu ida, maibé sira obriga sira baku malu no ha’u nia alin ne’e tuku monu kedan ema ida sadik ne’e no ha’u nia alin rasik mak lori nia ba ospital,” nia klarifika.
Tuir planu, matebian sei haloot iha semitériu Becusse Dili, hafoin ramata misa iha semitériu Becusse, Domingu ne’e.
Notísia relevante: Komité 12 Novembru husu PNTL investiga ho profisionál ba kazu mate iha sela polísia
Jornalista : Hortencio Sanchez
Editór : Florencio Miranda Ximenes
