iklan

EKONOMIA, HEADLINE, INKLUZAUN SOSIÁL, MUNISÍPIU, OÉ-CUSSE (RAEOA)

Autoridade RAEOA husu ofisiál sensu populasaun rekolla dadus ho siéntifiku no kredivél

Autoridade RAEOA husu ofisiál sensu populasaun rekolla dadus ho siéntifiku no kredivél

Autoridade RAEOA husu ofisiál sensu populasaun rekolla dadus ho sientífiku no kredivel. Imajen Tatoli/Abílio Elo Nini.

OÉ-CUSSE, 05 setembru 2022 (TATOLI) – Adjuntu Prezidente Autoridade Rejiaun Administrativa Espesiál Oé-Cusse Ambeno (RAEOA), Maximiano Neno, husu ofisiál tékniku sira-ne’ebé hala’o kna’ar iha sensu populasaun no uma-kain persiza rekolla dadus ho siéntifiku no kredivel.

“Ha’u fó hanoin de’it kona-bá atu hetan dadus di’ak siéntifiku no kredivél, depende karáter ema idak-idak nian iha terrenu, komunikasaun tenke di’ak, haraik-aan ko’alia ho inan-aman sira bele rona no kumpriende kona-bá estatístika sensu populasaun ne’e, tanba sensu populasaun ne’e maka fó destinu nasaun nian tanba ne’e dadus tenke efisiente no efikásia, labele manipula dadus, maibé dadus tenke kredivél no loloos, entaun presiza koordenasaun no komunikasaun di’ak tanba liuhosi dadus ne’e mak ita bele hatene progresu dezenvolvimentu iha ita-nia rai,” Maximiano Neno, ko’alia iha ámbitu enseramentu formasaun sensu populasaun iha igreja Numbei, Oé-Cusse.

Autoridade ne’e garante, durante semana ida formandu sira tuir ona formasaun atu tún iha terrenu, kna’ar rua ba supervizór ho enumeradór presiza ezerse funsaun ho loloos, tanba durante iha formasaun ne’e, bele hametin ho juramentu no reza entaun serbisu ne’ebé halo iha terren sei fó rezultadu pozitivu ba dadus sira.

Nia apela ba autoridade komunitáriu sira iha territóriu Oé-Cusse, atu kontribui halo mobilizasaun, sensibilizasaun atu hotu-hotu hatene partisipa, tanba iha sosiedade no família balun iha tendénsia atu hatete menus.

“Maibé husu ba ita hotu atu kontribui fó dadus no resposta loloos ba ajente sira halo pergunta, tanba simples loos no di’ak, nune’e iha fulan hirak nia laran bainhira rezultadu sai, ita sei hatene estatístika tinan hira nia laran loos duni no korresponde ba realidade sosiál no ekonómiku Timor-Leste nian ka lae, entaun Governu no parseiru internasionál sira serbisu hamutuk hodi bele hadi’a di’akliu tán,” nia fó hanoin.

Sekretária Rejionál ba Asuntu Finansa, Maria Eliza Maniquim, agradese ba Governu sentrál liuhosi Diresaun Jerál Estatístika hosi Ministériu Finansa, tanba fasilita ona formasaun ba formadu sensu populasaun.

“Ita apresia no fiar katak ekipa sira hotu nia kolaborasaun di’ak tebes, tanba liuhosi formasaun atu hasa’e koñesimentu, nune’e bele hatene oinsá rekolla dadus ba inan-aman sira ho loloos, ida-ne’e maka servidór estadu, presiza serbisu maka’as hodi kontribui ba dezenvolvimentu nasionál,” nia katak.

Sensu populasaun ba tinan 2022 ne’e, dahaat nian iha istória Timor-Leste nu’udar nasaun independente, hafoin realiza sensu populasaun no uma-kain iha tinan 2004, 2010 no 2015.

Nune’e liuhosi sensu populasaun no uma-kain ne’e realiza atu koñese ho naran resensiamentu kada tinan lima, ho objetivu atu rekolla informasaun atu hatene loloos estrutura populasaun to’o nível aldeia no suku.

Entretantu, formasaun ba ofisiál tékniku sira ba sensu populasaun no uma-kain tinan 2022 sei iha RAEOA hahú iha 04 setembru no remata iha 05 outubru 2022, hodi envolve formadu ba iha sensu populasaun no uma-kain iha RAEOA hamutuk na’in-221 komposta hosi supervizór no enumeradór.

Jornalista: Abílio Elo Nini
Editór: Evaristo Soares Martins

iklan
iklan

Leave a Reply

iklan
error: Content is protected !!